Ամեն տարի մարտի 15-ին միջազգային հասարակությունը նշում է Սպառողների պաշտպանության միջազգային օրը (World Consumer Rights Day)։ 1961 թվականի մարտի 15-ին ԱՄՆ նախագահ Ջոն Ֆ. Քենեդիի ելույթ է ունեցել ԱՄՆ Կոնգրեսում, որտեղ ձեւակերպել է սպառողների պաշտպանության 4 հիմնական կետերը. Անվտանգության իրավունք, տեղեկատվության իրավունք, ընտրության իրավունք եւ լսված լինելու իրավունք:
Ավելի ուշ այդ կետերին ավելացել են եւս 4-ը՝ վնասի փոխհատուցման իրավունք, սպառողական կրթության իրավունք, հիմնարար պահանջմունքների բավարարման իրավունք եւ առողջ շրջակա միջավայրի իրավունք։
Առաջին անգամ տոնը նշվել է 1983 թվականին, երբ այն ընդգրկվել է միջազգային օրացույցի տոնացույցում։ Այդ ժամանակվանից տոնը նշվում է ամեն տարի, ընդ որում ամեն տարի միջոցառումները նվիրված են լինում որոշակի մի թեմայի, որը սահմանում է Սպառողների միությունների համաշխարհային կազմակերպությունը (Consumer International, CI)։