ՀՀ վարչապետ կարեն Կարապետյանը այսօր՝ մարտի 15-ին, կառավարության նիստի ժամանակ անդրադարձավ կենսաթոշակի եւ պետական նպաստների արգելադրման ընթացակարգերի խախտումներին:
Նա նշեց, որ գործող օրենսդրական կարգավորումները սահմանում են առանձնահատկություններ՝ պետական կենսաթոշակների, նպաստների արգելանքի եւ բռնագանձման կիրառման դեպքերում:
«Մասնավորապես, կենսաթոշակի վրա արգելանք կարող է դրվել գումարի միայն 30 տոկոսի չափով, իսկ նպաստների վրա արգելանք, բռնագանձում առհասարակ չի կարող կիրառվել:
Միաժամանակ, գործնականում արձանագրվել են նշված օրենսդրական պահանջների խախտման մի շարք դեպքեր, ինչը պայմանավորված է նաեւ տեխնիկական դժվարություններով, այդ թվում՝ կենսաթոշակային համակարգի տվյալների, էլեկտրոնային շտեմարանի, դատական ակտերի հարկադիր կատարման ծառայության հասանելիության բացակայությամբ»,- ասաց վարչապետը:
Հաշվի առնելով դա՝ Կարեն Կարապետյանն Արդարադատության, Աշխատանքի եւ սոցիալական հարցերի, եւ «Թվային Հայաստան» հիմնադրամի տնօրենին հանձնարարեց եւ առաջարկեց Կենտրոնական բանկի նախագահին երկամսյա ժամկետում համատեղ մշակել եւ Կառավարության աշխատակազմ ներկայացնել առաջարկություններ գործնականում պետական կենսաթոշակի, նպաստների, ինչպես նաեւ՝ օրենքով սահմանված այլ վճարների, արգելադրման, բռնագանձման օրենքով սահմանված սահմանափակումների եւ ընթացակարգերի լիարժեք պահպանելու վերաբերյալ, այդ թվում՝ քննարկելով թվային գործիքների ներդրման եւ լուծումների նախատեսման հարցերը:
