Այս օրինագծով հստակ կսահմանափակվեն նախընտարական քարոզարշավի ժամանակ վարչական ռեսուրսի օգտագործման հնարավորությունները ոչ միայն թեկնածուների, այլեւ պետական ծառայողների կողմից: Այս մասին մարտի 15-ին ԱԺ պետաիրավական հարցերի եւ մարդու իրավունքների մշտական հանձնաժողովի նիստում Ընտրական օրենսգրքում փոփոխություններ եւ լրացումներ կատարելու մասին օրինագծի քննարկման ժամանակ ասաց արդարադատության առաջին փոխնախարար Արթուր Հովհաննիսյանը:
Պաշտոնյայի խոստովանությամբ՝ Հայաստանում անցկացված ընտրությունների ընթացքում եղել են խախտումներ եւ պաշտոնական դիրքի սահմանազանցման դեպքեր այն անձանց կողմից, որոնք պատասխանատու էին արշավի եւ բուն քվեարկության ընթացքի համար, ինչի մասին վկայել են միջազգային շատ կառույցներ ու կազմակերպություններ: «Միջազգային կառույցներն իրենց զեկույցներում նշել են, որ առկա է վտանգ, որ պաշտոնյաները կամ պաշտոնատար անձինք կօգտագործեն ձեռքի տակ ունեցած վարչական ռեսուրսը իրենց ձեռնտու թեկնածուին կամ իշխող կուսակցությանը առաջ մղելու համար»,- պարզաբանեց Հովհաննիսյանը:
Ըստ որում՝ նա ընդգծեց, որ հաշվի առնելով միջազգային փորձը՝ վարչական ռեսուրս ասելով նկատի ունեն ինչպես ֆինանսական, այնպես էլ նյութական, ոչ նյութական ու այլ ռեսուրսները, որոնք ոչ թե մասնավոր, այլ հանրային բյուջեի մասն են: Նա նշեց, որ այս օրինագծով կարգելվի նշված ռեսուրսների օգտագործումը այս կամ այն պաշտոնատար անձանց կողմից ընտրությունների անցկացման ժամանակ այս կամ այն թեկնածուին աջակցություն ցուցաբերելու համար: Այսպես՝ կարգելվի օգտագործել հասարակական եւ ծառայողական տրանսպորտը, բյուջեի միջոցները, տարածքները, կապի միջոցները, տեղեկությունները, ինչպես նաեւ այլ կարգի նյութական եւ մարդկային ռեսուրսները:
Դրանից բացի, նախընտրական քարոզչություն անցկացնելը կտրականապես կարգելվի դատավորներին, իրավապահ մարմինների աշխատակիցներին, դատախազներին, քննիչներին, Ազգային անվտանգության ծառայության աշխատակիցներին, բոլոր մակարդակների ընտրական հանձնաժողովների անդամներին, Հեռուստատեսության եւ ռադիոյի ազգային հանձնաժողովին, Մարդու իրավունքների պաշտպանին: