Մինչ «Ելք» դաշինքում վերջնական որոշում կընդունվի Սերժ Սարգսյանի դեմ փողոցային պայքար սկսելու հարցի շուրջ, Նիկոլ Փաշինյանի ղեկավարած «Քաղաքացիական պայմանագիր» կուսակցությունն արդեն քաղաքապետարանից  թույլտվություն է ստացել ապրիլի 3–ին Ազատության հրապարակում հանրահավաք, ապա երթ անցկացնելու  վերաբերյալ։

Ուշագրավ է, որ հանրահավաք անցկացնելու մասին  դաշինքի անդամ «Լուսավոր Հայաստան» կուսակցությունը տեղեկացել է միայն երեկ։ «Լուսավոր Հայաստան» կուսակցության անդամ, պատգամավոր Գեւորգ Գորգիսյանը NEWS.am–ի հետ զրույցում  ասաց, որ քննարկումները շարունակվում են դաշինքում եւ դեռ հայտնի չէ՝ ինչ որոշում կլինի։ Ըստ նրա, քանի որ  փողոցային պայքարի ճանապարհային քարտեզի հեղինակը «Քաղաքացիական պայմանագիր»–ն է, հույս ունի, որ «Ելք»–ը դա կընդունի եւ նախապատրաստական աշխատանքներն սկսել է։

«Բայց դեռեւս որոշում չկա, որ որեւէ բան անելու ենք։ Սա ընդամենը տակտիկական քայլ էր հետագայում փաստի առաջ չկանգնելու համար: Դեռ որոշում չկա, որ այդ օրն ինչ–որ բան առհասարակ լինելու է։ Մենք տեղյակ չէինք իրազեկումից, երեկ եմ իմացել, երբ արդեն քաղաքապետարանի կայքում կար, բայց խնդիր չեմ տեսնում»,–ասաց Գեւորգ Գորգիսյանը։

Մեր զրուցակիցը շեշտեց, որ այս ճանապարհային քարտեզին միայն «Լուսավոր Հայաստան» կուսակցությունը չէ, որ դեմ է, դաշինքում այլ  կուսակցությունների ներկայացուցիչներ նույնպես դեմ են. «Լուսավոր Հայաստանը» չի միայն, որ դեմ է առաջարկված փաթեթին, դաշինքում մեծամասնությամբ դեմ են առաջարկված նախագծին,  այսինքն՝ ոչ թե դեմ են, այլ խնդիրներ են տեսնում։ «Լուսավոր Հայաստանը» դեմ չէ փողոցային պայքարին, մյուս կուսակցությունների ներկայացուցիչներն էլ տեսնում են ռիսկեր, որոնք քննարկվում են։ Կան մտահոգություններ՝ արդյոք ծախսվող ռեսուրսն ու էներգիան նպատակին կծառայի, թե ոչ։  Մենք բազմիցս ասել ենք, որ ժողովրդին չենք տանի հիասթափության եւ այսօր քննարկում նեք՝ արդյոք սա չի լինելու այդ հիասթափության տանելու փակուղին»,–ասաց պատգամավորը։