Կառավարությունը մարտի 15-ի նիստում հաստատեց 2018-2030 թվականների համար ջրամատակարարման եւ դրենաժի ոլորտի զարգացման ռազմավարությունը ու ֆինանսավորման ծրագիրը: Որոշման նախագիծը ներկայացրեց Ջրային տնտեսության պետական կոմիտեի փոխնախագահ Վոլոդյա Նարիմանյանը:
Նրա խոսքով՝ այս ռազմավարության համաձայն Հայաստանի ջրային ոլորտում հետագա բարեփոխումները պետք է կենտրոնանան դրենաժի, ինչպես նաեւ ոչ ցանցային տարածքների ջրամատակարարման բարելավման վրա:
Փաստաթղթի համաձայն՝ ջրային հատվածի նախկին բարեփոխումները հիմնականում կենտրոնացած էին ցանցային շրջանների ջրամատակարարման բարելավման վրա, եւ գրեթե 570 ոչ ցանցային բնակավայրերը ցածրորակ ծառայություն են ստանում ու համարժեք ներդրումների կարիք ունեն:
Մինչեւ միասնական օպերատորի ընտրությունը բնակելի համալիրներում ջրամատակարարման ծախսերի մեծ մասն ուղղվում էր գոյություն ունեցող գույքի վերակառուցմանը: Հիմա այս ծախսերը կատարում է միասնական օպերատորը, եւ ոչ ցանցային շրջանները հաճախ զրկված են ուշադրությունից եւ համապատասխան ֆինանսավորումից:
Ռազմավարության շրջանակում կառավարության առաջնահերթ գործողություններն են պայմանագրով վարձակալված գույքի արդյունավետ կառավարումը, շահագործումը եւ տեխնիկական սպասարկումը, վարձակալներին ծառայությունների արդյունավետ տրամադրումը, ինչպես նաեւ հասարակության համար ընդունելի սակագների փոփոխությունը, հուսալի եւ հասանելի ծրագրերի իրականացումը ջրամատակարարման եւ դրենաժի համակարգերի կայուն, անվտանգ եւ անընդհատ ապահովման համար ինչպես ցանցային, այնպես էլ ոչ ցանցային շրջաններում: