Կաշառք վերցնելու մեջ մեղադրվող Շենգավիթի նախկին դատավոր Իշխան Բարսեղյանի գործով դատական նիստն այսօր մարտի 15-ին, Երեւանի ընդհանուր իրավասության դատարանի Շենգավիթի նստավայրում հետաձգվեց Իշխան Բարսեղյանի չներկայանալու պատճառով:
Նշենք, որ Իշխան Բարսեղյան դիմում էր ներկայացրել դատարան առ այն, որ ինքը վատառողջ է, չի կարող ներկայանալ դատական նիստին եւ խնդրում է նիստը հետաձգել:
Մեղադրող Կարեն Բիշարյանն էլ հայտարարեց, որ մեղադրյալ Իշխան Բարսեղյանը միտումնավոր ցանկանում է ձգձգել դատաքննությունը եւ ամեն անգամ նման պատճառաբանությունններով չի ներկայանում:
«Դատապարտյալների հիվանդանոցից մենք տեղեկություն ենք ստացել, որ Իշխան Բարսեղյանը կարողանում է ինքնուրույն տեղաշարժվել եւ միտում եմ տեսնում Իշխան Բարսեղյանի կողմից, որ դատաքննությունը ձգձգվի»,-ասաց մեղադրողը:
Դատավոր Վաչե Մարգարյանն էլ հայտարարեց, որ արդեն տեւական ժամանակ Իշխան Բարսեղյանի չներկայանլով խաթարվում է դատաքննության բնականոն ընթացքը եւ ինքը Իշխան Բարսեղյանի նկատմամբ դատական սանկցիա է կիրառում նկատողության տեսքով, հետագայում նման կերպ շարունակվելու դեպքում ավելի խիստ դատական սանկցիա կկիրառվի:
Դատական նիստը հետաձգվեց, հաջորդ դատական նիստը նշանակվեց մարտի 22-ին:
Նշենք, որ գործով դատական նիստերը արդեն մի քանի անգամ հետաձգվում են, Իշխան Բարսեղյանը չի կարողանում վատառողջ լինելու պատճառով ներկայանալ նիստերին:
Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ որպես խափանման միջոց ընտրվել է կալանավորումը:Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո: