«Երկիր ծիրանի»  կուսակցության ղեկավար Զարուհի Փոստանջյանն այսօր՝ կուսակցության ստեղծման տարեդարձի միջոցառման ժամանակ հայտարարեց, որ իրենք ընդվզում են հայտարարել եւ այն շարունակելու են մինչեւ վերջ։ Զարուհի Փոստանջյանը նպատակադրվել է համախմբել ողջ ժողովրդին ընդդեմ իշխանական արատավոր համակարգի, սակայն  Սերժ սարգսյանի վարչապետական ծրագրի տապալմաննպատակով ընդվզում սկսկող Նիկոլ  Փաշինյանի պայքարին  միանալու որոշում չունի։

Խորհրդարանական ընտրությունների ժամանակ  Զարուհի Փոստանջյանը համարում էր, որ «Ելք»–ը արհեստական դաշինք  է եւ նպատակահարմար չհամարեց ընդունել նրանց ցուցակում անցողիկ տեղում հայտնվելու առաջարկը։ Հարցին՝ հնարավոր է՝ փողոցային պայքարի հարցի քննարկման շուրջ կոնսենսուս չլինի  դաշինքում եւ  Ազատության հրապարակ գործուղվի միայն Նիկոլ Փաշինյանը, այս դեպքում  կմիանա՞ Փաշինյանին, Փոստանջյանը պատասխանեց. «Փաշինյանի պայքարը ինձ հայտնի չէ, չգիտեմ՝ ինչի համար է պայքարում, հետեւաբար չեմ կարող կարծիք հայտնել։ Մենք մերժում ենք 25–ամյա բռնակալությունը»։

Լրագրողների հիշեցմանը՝ Սերժ Սարգսյանի՝ վարչապետի պաշտոնում առաջադրվելու ծրագրի դեմ է ընդվզում, ասաց. «Սերժ Սարգսյանի վարչապետ լինել–չլինելը չի լուծելու խնդիրը։ Եթե նույնիսկ Սերժ Սարգսյանը չլինի վարչապետ, մենք որեւէ խնդիր չենք լուծելու։ Մինչեւ Սերժ Սարգսյանը Ռոբերտ Քոչարյանն էր, իսկ մինչ դա Լեւոն Տեր–Պետրոսյանն էր։ Այսինքն՝ տվյալ պարագայում անունները կարող են փոխվել, բայց այլ բան չի փոխվում։ Հետեւաբար անձանց անուն ազգանունների խնդիրը չէ, խնդիրը համակարգային է, եւ պետք է լուծենք այս խնդիրը։ Արդեն ասեցի՝ կարեւորն այն է,  որ համախմբվենք ազգով, այլ ոչ թե քաղաքական միավորները պետք է իրար միանան, մենք խնդիր ունենք գաղափարի շուրջ միավորվելու, իսկ գաղափարը Սերժ Սարգսյանի վարչապետ լինել– չլինելը չէ»։