Երեւանի ավագանու մարտի 19–ի նիստում ընդգրկված է Վազգեն Սարգսյանի անվան փողոցը Վուդրո Վիլսոնի անվամբ անվանակոչելու նախագիծը։ Նածագծի հեղինակն է «Երկիր ծիրանի» խմբակցությունը։ «Ելք» դաշինքի որոշ անդամներ արդեն իսկ իրենց կոշտ դիրքորոշումը հայտնել են այս նախագծի կապակցությամբ, սակայն Զարուհի Փոստանջյանն ու իր թիմակիցները անդրվելի են։ «Երկիր ծիրանի» խմբակցության անդամ Մարինա Խաչատրյանը NEWS.am–ի հետ զրույցում հայտարարել է, որ Վազգեն Սարգսյանի անվամբ մեկ փողոցն էլ բավական է։
«Ես նրանց քննադատություններին ժամանակի սղության պատճառով չեմ ծանոթացել, բայց նշեմ, որ մեր քաղաքի սրտում Վազգեն Սարգսյանի անվան երկու փողոց կա եւ, իհարկե, նրանցից մեկը պետք է անվանակոչվի Վիլսոնի անվամբ, քանի որ նա հայ ազգի համար շատ մեծ նշանակություն ունեցող անձնավորություն է։ Ընդ որում այդ երկու փողոցներից մեկին Վազգեն Սարգսյանի կիսանդրին մեջքով է շրջված։ Գուցե այլ խմբակցության անդամներ նշում են՝ ինչպես կարելի է դիպչել ազգային հերոս Վազգեն Սարգսյանին, այո ոչ ոք չի ժխտում, որ նա մեծություն է,սակայն, չէ՞ որ մենք ունենք նաեւ այլ ազգային հերոսներ՝ Ժիրայր Սեֆիլյանը, Պավլիկը, Միայնակ Գայլը, որոնք այսօր բանտախցերում են, ինչո՞ւ են նրանք մոռանում այդ հերոսների մասին»,–մեկնաբանել է Մարինա Խաչատրյանը։
Վերջինս շեշտել է, որ այլ փողոց հարկավոր չէ անվանափոխել Վիլսոնի անվամբ, քանի որ դա պետք է լինի Լենինի արձանի նախկին տարածքին հարակից եւ դրա համար հարմար է Սպարապետի անվան փողոցը։
Նշենք, որ Վազգեն Սարգսյանի անվամբ փողոց Երեւանում միայն մեկն է, Հանրապետության հրապարակից մինչեւ Մյասնիկյանի արձանի հարակից տարածքը։