Ղարաբաղյան հակամարտությունը չի կարող պարզ լուծում ունենալ: Այս մասին «Էխո Մոսկվի»-ին տված հարցազրույցում հայտարարել է ՌԴ նախագահի թեկնածու Քսենիա Սոբչակի նախընտրական շտաբի գլխավոր քաղաքական խորհրդական, քաղաքական տեխնոլոգ Ստանիսլավ Բելկովսկին:
Նրա խոսքով, հակամարտության լուծման համար անհրաժեշտ է լիովին նոր հայեցակարգ, եւ դա պահանջում է քաղաքական սերնդափոփոխություն` եւ Հայաստանում, եւ Ադրբեջանում եւ Ռուսաստանում, որը, այսպես թե այնպես կմնա այս դաշտում որպես դերակատար, թեկուզ ոչ այնքան ազդեցիկ, ինչպես 90-ական թվականների սկզբում, երբ Ռուսաստանի դիրքորոշումը կախված էր նրանից, թե ով է հաղթում «այդ ժամանակների դե-ֆակտո հայ-ադրբեջանական պատերազմում»:
Նրա կարծիքով, աշխարհաքաղաքական տեսանկյունից Մոսկվան չի կարող 100 տոկոսով հեռու պահել իրեն այս խնդրից: «Պատմական պարույրի հաջորդ գալարում որոշակի մասնաբաժինը պատկանում է Ռուսաստանին», - նշել է Բելկովսկին:
Նա նշել է, որ Ռուսաստանն ու Հայաստանը դաշնակիցներ կմնան մի շարք աշխարհաքաղաքական եւ աշխարտնտեասական գործոնների պատճառով: «Բայց միեւնույն ժամանակ Ռուսաստանը չպետք է իրեն որպես Հայաստանի ուսուցիչ եւ կամ դաստիարակ ընկալի: Այն պետք է լինի գործընկեր, թեկուզ ավագ, բայց գործընկեր»: