ԱՄՆ Ներկայացուցիչների պալատի 36 անդամ միացել է Կոնգրեսի Հայկական հարցերով հանձնախմբի համանախագահ, ԱՄՆ Կոնգրեսի Ներկայացուցիչների պալատի անդամ Ֆրենկ Փալոնին՝ կոչ անելով Ներկայացուցիչների պալատի արտաքին օգնության հատկացումների հանձնաժողովի նախագահ Հոլ Ռոջերսին եւ կոնգրեսական Նիտա Լովեյին սատարել Արցախի եւ Հայաստանի համար 2019 ֆինանսական տարում 70 միլիոն դոլարի օգնության փաթեթին, հաղորդում է Հայ դատի ամերիկյան հանձնախումբը:
«Մենք ցանկանում ենք եւս մեկ անգամ մեր երախտիքը հայտնել կոնգրեսական Փալոնին, Հայկական հարցերով հանձնախմբի նրա գործընկերներին եւ բոլոր նրանց, ովքեր միացել են Արցախի եւ Հայաստանի համար «խաղաղության եւ բարգավաճման» օգնության փաթեթին աջակցելուն։ Այս նամակում ամրագրված են խաղաղության, բարգավաճման եւ երկարաժամկետ կայունության առաջնահերթությունները»,- ասել է Հայ դատի ամերիկյան հանձնախմբի գործադիր տնօրեն Արամ Համբարյանը:
Հիշեցնենք, որ ավելի վաղ Ամերիկայի Հայ Դատի հանձնախումբը դիմել էր Սենատի՝ 2019 ֆինանսական տարվա արտաքին օգնության օրինագծի մշակման համար պատասխանատու հանձնաժողովին՝ կոչ անելով 70 միլիոն դոլարի օգնության փաթեթ տրամադրել Արցախի ականազերծման եւ վերականգնման, սահմանից դիպուկահարների հեռացման Ռոյս-Էնգել նախագծի կյանքի կոչման, ԱՄՆ-Հայաստան տնտեսական եւ ռազմական համագործակցության ծավալման եւ Հայաստանին որպես Մերձավոր Արեւելքում փախստականների ապաստարանի աջակցելու համար:
Մասնավորապես, Հանձնախումբը առաջարկել է 6 միլիոն դոլար տրամադրել Արցախին՝ ականազերծման եւ հաշմանդամների վերականգնման համար եւ 4 միլիոն դոլար՝ խաղաղության աջակցման համար, ինչպես նաեւ 30 միլիոն դոլար Հայաստանին՝ որպես տնտեսական օգնություն, 10 միլիոն դոլար՝ որպես ռազմական օգնություն, 20 միլիոն դոլար՝ որպես Մերձավոր Արեւելքից փախստականների ընդունման համար օգնություն: Նաեւ առաջարկվում է կասեցնել Ադրբեջանին տրամադրվող ռազմական օգնությունը:
