Այս տարի, իսկապես ցրտահարության վտանգ կա: Այս մասին, այսօր՝ մարտի 16-ին, լրագրողների հետ հանդիպման ժամանակ նշել է «Ագրարագյուղացիական միավորում» ՀԿ նախագահ Հրաչ Բերբերյանը:
«Շատ ցավալի կլինի, եթե ցրտահարություն լինի: Դեռ 15 օր առաջ մենք զգուշացրել ենք, որ գյուղացիները ծխակույտերը պատրաստեն՝ հնարավոր ցրտահարությանը պատրաստ լինելու համար: Մեզնից հետո գյուղնախարարությունը եւս հասկացավ եւ հայտարարեց այդ մասին: Կարծում եմ՝ կխուսափենք ցրտահարությունից, բայց իրոք, տարին ռիսկային է: Պրակտիկան ցույց է տալիս, որ հատկապես ծիրանենիների դեպքում 4-5 տարին մեկ բերքի անկում ենք ունենում: Կարծես թե բնությունը ստիպում է՝ ծառը հանգստանա»,-ասաց Բերբերյանը:
Նա նշեց, որ մնացած մշակաբույսերի համար նման խնդիր չեն տեսնում. «Խնդիրը հիմնականում ոռոգման համակարգում է, թող բարի լինեն ջուրը հասցնեն գյուղացուն: Պատահական մարդիկ ջրի վրա հողմաղացներ են աշխատեցնում ու գումար աշխատում: Ախուրյանի ջրամբարում ձմռանը ջրի պահուստը պետք է լիներ 40 մլն խմ, փաստացի 14 մլն է եղել: Գյուղացին էներգետիկներին չի ների, որ իր ջուրն օգտագործեն իրենց չար նպատակներով»,-ընդգծեց ՀԿ ղեկավարը:
Ինչ վերաբերում է երաշտի հավանականությանը, Բերբերյանը նկատեց, որ փետրվարի տեղումները փարատեցին մտահոգությունները, թե ջրի պակաս կլինի:
«Եթե ձնհալը հարթ անցնի, իսկ շեշտակի տաքացումը բերելու է շատ լավ ձնհալի, ապա խնդիր չի լինի: Թող բարի լինեն ջրատարները մաքուր պահեն եւ ջրամբարները կլցվեն: Այսօրվա ձյան ծածկույթը բավարար է ջրամբարները լցնելու համար: Եթե ջրամբարները չլցվեն, դա թամբալության հետեւանք է լինելու»,-ասաց նա: