Արագածոտնի մարզի ընդհանուր իրավասության դատարանում այսօր՝ մարտի 16-ին, Շամիրամում 4 եզդիների սպանության գործով հանցագործությունը պարտակելու մեջ մեղադրվող Քյարամ Քալաշյանի խափանման միջոց կալանքը փոխելու մասին միջնորդությունը դատարանը մերժեց։
Դատարանը մերժեց պաշտպան Կրոմվել Գրիգորյանի միջնորդությունը դատական նիստը հետաձգելու վերաբերյալ, գործի նյութերին ծանոթանալու համար եւ դատավոր Սուրեն Մնոյանը հայտարարեց, որ դատական նիստերն անհարկի ձգձելու միտում է տեսնում։
Կրոմվել Գրիգորյանը փորձեց ինքնաբացարկի միջնորդություն ներկայացնել, սակայն դատավոր Մնոյանը չթույլատրեց, խնդրելով մեղադրողին ներկայացնել մեղադրանքը։
Պաշտպանը սկսեց վիճաբանել դատավորի հետ, որ վերջինս իրավունք չունի առանց իր միջնորդությունը քննելու անցնել դատաքննության բուն փուլին։ Երբ Կրոմվել Գրիգորյանը ցանկացավ լքել նիստերի դահլիճը, դատավոր Սուրեն Մնոյանը հայտարարեց, որ թույլ չի տալիս պաշտպանին լքել նիստերի դահլիճը, ապա թույլատրեց պաշտպանին ներկայացնել միջնորդությունը։
Կրոմվել Գրիգորյանը հայտարարեց, որ հաջորդ ուրբաթ կներկայացնի դատավորի ինքնաբացարկի միջնորդությունը։
Դատական նիստը հետաձգվեց , հաջորդ դատական նիստը նշանակվեց մարտի 23-ին։
Ըստ մեղադրական եզրակացության՝ Թելման Քալաշյանին մեղադրանք է առաջադրվել այն բանի համար, որ նա 2017թ. օգոստոսի 1-ին Արագածոտնի մարզի Շամիրամ համայնքի գերեզմանատանը կից սգո սրահում, շատերի կյանքի համար վտանգավոր եղանակով կատարել է չորս անձանց սպանություն, բացի այդ, 1999թ. ապօրինի կերպով ձեռք է բերել, պահել հրազեն եւ ռազմամթերք, 2012թ. դեկտեմբերից մինչեւ 2014թ. նոյեմբերն ընկած ժամանակահատվածում կատարել է վաշխառություն` որի հետեւանքով տուժողներն ընկել են նյութական ծանր կացության մեջ, 25.08.2017թ. կատարել է նաեւ սուտ մատնություն:
Թելման Քալաշյանի հորեղբորը՝ Քյարամ Քալաշյանին մեղադրանք է առաջադրվել այն բանի համար, որ նա պարտակել է առանձնապես ծանր հանցագործությունը` շատերի կյանքի համար վտանգավոր եղանակով, չորս անձանց սպանությունն իրականացրած Թելման Քալաշյանին:
Թելման Քալաշյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով, 213-րդ հոդվածի 2-րդ մասի 1-ին կետով, 235-րդ հոդվածի 1-ին մասով եւ 333-րդ հոդվածի 1-ին մասով, իսկ հորեղբորը՝ ՀՀ քրեական օրենսգրքի՝ 334-րդ հոդվածի 1-ին մասով: Նրանց նկատմամբ որպես խափանման միջոց է ընտրվել կալանավորումը: