Պատայայի քաղաքային խորհուրդը որոշում է ընդունել լողափում ծխելու տուգանքը մոտ 3 հազար դոլարից նվազեցնել մինչեւ մոտ 65 դոլար, հայտնում է Pattaya News-ը:
Փոփոխությունները ուժի մեջ կմտնեն ապրիլի առաջին երկուշաբթիից: Հիշեցնենք, որ Թաիլանդում փետրվարի 1-ից սկսել է գործել լողափերում ծխելն արգելող օրենքը, իսկ որպես պատիժ սահմանվել է տուգանք եւ/կամ մինչեւ մեկ տարի ժամկետով բանտարկություն:
Պատայայի քաղաքային խորհուրդը տուգանքի չափի նվազման մասին նախատեսում է զբոսաշրջիկներին տեղեկացնել թայերեն, անգլերեն եւ չինարեն հատուկ վահանակների միջոցով:
Արգելքի պահպանմանը հետեւում են լողափերում պարեկող քաղաքապետարանի աշխատակիցները, խախտումները գրանցվում են տեսահսկման խցիկներով:
Արգելքը չի տարածվում լողափերի մուտքերի մոտ տեղակայված ծխելու համար հատուկ առանձնացված գոտիներում:
