Իտալիայի վարչապետ Պաոլո Ջենթիլոնին հեռախոսով իր բրիտանացի գործընկեր Թերեզա Մեյի հետ քննարկել է «Մեծ Բրիտանիայի ու Ռուսաստանի միջեւ դիվանագիտական ճգնաժամը», որը հաջորդել է Ռուսաստանի հատուկ ծառայությունների նախկին աշխատակից Սերգեյ Սկրիպալի թունավորմանը, հայտնում է ՌԻԱ Նովոստին։
Զրույցի ընթացքում Ջենթիլոնին հաստատել է , որ իտալական կողմը դատապարտում է այդ միջադեպը ու հայտնել է, որ «ամբողջովին համերաշխ» է Բրիտանիայի իշխանությունների հետ, վստահություն հայտնելով, որ «նրանք կկարողանան գտնել ու պատժել նրանց, ովքեր մեղավոր են մի արարքում, որտեղ խոսքը փաստացի քիմիական զենքի գործածման մասին է»։
«Վարչապետը նաեւ շեշտել է, որ Մեծ Բրիտանիան միանգամայն լեգիտիմ կերպով է Ռուսաստանից պահանջում տալ հստակ ու ամբողջական պատասխաններ այդ ծայրահեղ լուրջ դրվագում իր դերակատարման մասին»,- ասվում է հաղորդագրությունում։
Գերմանիայում գտնվող Շվեդիայի վարչապետ Ստեֆան Լյովենն էլ իր հերթին հայտնել է, որ Ռուսաստանը պետք է բացատրի Սկրիպալի ու նրա դստեր թունավորումը Մեծ Բրիտանիայում։
«Մենք համամիտ ենք այն գնահատականին, որ ամենայն հավանականությամբ այդ հանցագործության համար պատասխանատու է Ռուսաստանը»,- ասել է վարչապետը, Գերմանիայի կանցլեր Անգելա Մերկելի հետ նրա համատեղ մամուլի ասւոլիսը հեռարձակվել է SVT շվեդական հեռուստատեսությունով։
Լյովենը նշել է, որ պատրաստ չէ խոսել ՌԴ –ի դեմ հնարավոր պատժամիջոցների մասին ու որ այդ հարցը, ամենայն հավանականությամբ, կքննարկվի հաջորդ շաբաթ ԵՄ շրջանակներում։