Microsoft ընկերությունը արձագանքել է իր կին աշխատակիցների գանգատներին, որոնք ընկերությանը մեղադրել են սեռական նշանով խտրականության մեջ։ Կադրերի բաժնի ղեկավար Քեթրին Հոգանի էլեկտրոնային նամակը, որն ուղարկվել էր բոլոր աշխատակիցներին, հրապարակվել է ընկերության պաշտոնական կայքում, հայտնում է ՏԱՍՍ-ը։

 «Մենք ձգտում ենք, որ բոլոր աշխատակիցների ձայները լսելի լինեն,-ասոմ է նա,- Մենք ձգտում ենք ստեղծել այնպիսի միջավայր, որում յուրաքանչյուր աշխատակից զգա, որ իրեն հարգում են, որ ինքն անվտանգության մեջ է ու որ կարող է իրացնել իր ամբողջ ներուժը»։

Միաժամանակ Հոգանը խոստովանել է, որ անցած տարվա ընթացքում 84 գանգատ է ստացել գենդերային խտրականության վերաբեյալ, որոնցից մոտ 10 տոկոսը մասամբ կամ ամբողջովին հիմնավորված են եղել ու դրանց վերաբերյալ համապատասխան միջոցառումներ են ձեռնարկվել։ Իր նամակում նա նաեւ շեշտել է, որ ավելի քան 20 աշխատակից հեռացվել է աշխատանքից սեռական ոտնձգությունների պատճառով։

Ավելի վաղ հայտնել էին, որ Microsoft ընկերության կին աշխատակիցները հարյուրավոր բողոքներ են ներկայացրել 2010-2016 թթ ժամանակահատվածում սեռական նշանով խտրականության համար։