Մոսկվայում, մարտի 13-15-ին կայացած MITT միջազգային զբոսաշրջային ցուցահանդեսին մասնակցել է նաեւ Արցախի պատվիրակությունը:
ՀՀ մշակույթի նախարարությունից NEWS.am-ին հայտնում են, որ Արցախը ներկայացված էր առանձին տաղավարով: Ցուցահանդեսի ընթացքում մասնակիցներին ու հյուրերին տրամադրվել է Արցախի զբոսաշրջային գրավչությունների, զբոսաշրջային արդյունքի,զբոսաշրջության հեռանկարային ճյուղերի մասին տեղեկություն պարունակող գրականություն, ինչպես նաեւ արցախյան տուրօպերատորների վերաբերյալ տեղեկություն: Մասնակից զբոսաշրջային օպերատորներից որոշներն արդեն իսկ հետաքրքրված են Արցախով:
Գործնական քայլեր եւ հետագա համագործակցություն ապահովելու համար նրանց փոխանցվել է հստակ տեղեկատվություն արցախյան գործընկերների վերաբերյալ:
Արցախը ներկայացնող տաղավարը կազմակերպել է նաեւ արցախյան գինու համտես՝ միաժամանակ Արցախի ու արցախյան գինեգործության պատմության հետաքրքիր մանրամասներ տրամադրելով միջազգային ցուցահանդեսի մասնակիցներին ու հյուրերին: