ԵՄ-ն 31 մլն եվրո կհատկացնի Լատինական Ամերիկայի ու Կարիբյան ավազանի երկրներին՝ որպես հումանիտար օգնություն ու տարերային աղետներին դիմակայելու հարցում տարածաշրջանի պատրաստվածությունն ապահովելու համար։ Այս մասին հայտնել է հումանիտար օգնության ու ճգնաժամային կառավարման հարցերով եվրահանձնակատար Քրիստոս Ստիլիանիդիսը՝ Կոլումբիա իր պաշտոնական այցելության ժամանակ, փոխանցում է ՏԱՍՍ-ը։
« ԵՄ հանձնառությունը աջակցել Լատինական Ամերիկայի երկրներին՝ այսօրվա դրությամբ ավելի ուժեղ է, քան երբևէ։ Կոլումբիայում մեր նոր ֆինանսական աջակցությունը երկու նպատակ է հետապնդելու՝ բազմամյա հակամարտության հումանիտար հետևանքների հաղթահարումը ու օգնության տրամադրումը՝ տարերային աղետներին դիմակայելու ու արձագանքելու հարցում տարածաշրջանի պատրաստվածության ապահովման համար»,- ասել է նա։
Ստիլիանիդիսը հանդիպել է Կոլումբիայի նախագահ Խուան Մանուել Սանտոսի հետ Բոգոտայում, որտեղ հաստատել է ԵՄ հանձնառությունը՝ օգնել լատինաամերիկյան հանրապետությանը դեպի խաղաղություն ու բարգավաճում նրա ճանապարհին։
