Ազգային ժողովի կողմից նախագահ ընտրված Արմեն Սարգսյանի երդմնակալության արարողությանը մասնակցելու որոշում դեռեւս չունի ընդդիմադիր «Ելք» խմբակցությունը։ Միայն խմբակցության ղեկավար Նիկոլ Փաշինյանն է հայտարարել, որ չի մասնակցի այդ արարողությանը, քանի որ լինելու է այլ տեղում։
«Ելք» դաշինքի պատգամավոր, «Լուսավոր Հայաստան» կուսակցության անդամ Գեւորգ Գորգիսյանը NEWS.am–ի հետ զրույցում ասաց, որ ՀՀ 4-րդ նախագահի երդմնակալությանը մասնակցել-չմասնակցելու հարցը դեռ չեն քննարկել. «Դեռ չենք քննարկել հարցը, միայն պարոն Փաշինյանն է իր կարծիքը հայտնել, որ չի պատրաստվում գնալ, իսկ դաշինքում դեռեւս չի քննարկվել»,–ասել է պատգամավորը։ Հարցին՝ հնարավո՞ր է, որ այդ հարցը թողնեն պատգամավորների հայեցողությանը, նա դժվարացավ պատասխանել։
Նշենք, որ Ազգային ժողովում ընդդիմադիր համարվող «Ծառուկյան» խմբակցությունը արդեն որոշում ունի. նրանք կողմ են քվեարկել Արմեն Սարգսյանի թեկնածությանը եւ նրա երդմնակալության արարողությունը բաց չեն թողնի։
Ավելի վաղ NEWS.am-ը հայտնել էր, որ Նիկոլ Փաշինյանը, անկախ դաշինքի որոշումից, Սերժ Սարգսյանի վարչապետ դառնալը կանխելու օրակարգով Ազատության հրապարակում պայքար է սկսելու, առաջին հանրահավաքն էլ նախատեսված է ապրիլի 3–ին։
Հիշեցնենք, որ ՀՀ 4-րդ նախագահն իր լիազորությունները կստանձնի ապրիլի 9-ին, ԱԺ հատուկ նիստում:
