Սիրիայի Աֆրին քաղաքի ինքնակառավարման մարմինները կոչ են արել միջազգային հանրությանը ստիպել Թուրքիային դադարեցնել քաղաքի գնդաակոծումը։ Այս մասին նշված է քաղաքային իշխանությունների տարածած հայտարարության մեջ, գրում է «ՌԻԱ Նովոստի»-ն։
Հունվարի 20-ին Թուրքիայի ԶՈՒ Գլխավոր շտաբը հայտարարել էր սիրիական Աֆրինում քրդական կազմավորումների դեմ «Ձիթենու ճյուղ» գործողության մեկնարկի մասին: Դամասկոսը վճռականորեն դատապարտել էր Աֆրինում Թուրքիայի գործողությունները՝ նշելով, որ այդ տարածքը Սիրիայի անբաժանելի մասն է:
Բացի այդ, Աֆրինի իշխանությունները կոչ են արել միջազգային հանրությանը միջամտել Հալեպից հյուսիս-արեւելք՝ Շահբա նահանգում փախստականների շուրջ ստեղծված իրավիճակին եւ «արձագանքել մարդկային խղճի կոչերին՝ օգնել եւ փրկել տասնյակ հազարավոր տեղահանված քաղաքացիական անձանց կյանքեր»։
Հաղորդագրության մեջ նշվում է նաեւ, որ շաբաթներ առաջ թուրքական ռազմական ինքնաթիռները եւ հրետանին սկսել են ավելի ինտենսիվ հրետանակոծել Աֆրինը՝ պատրաստվելով հարձակման։
