Մարտի 17-ին Ուկրաինայի Դնեպր քաղաքում, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի, կատարվեց Սուրբ Գրիգոր Լուսավորիչ եկեղեցու օծման հանդիսավոր արարողությունը: Եկեղեցին կառուցվել է տեր եւ տիկին Ռաֆայել եւ Շամիրամ Հարությունովների ազնիվ բարերարությամբ:

Մայր Աթոռից NEWS.am-ին հայտնում են, որ նորակառույց եկեղեցու առջեւ Ամենայն Հայոց Հայրապետին մեծ խանդավառությամբ ու ծափողջույններով դիմավորեցին տարբեր համայնքներից այս ուրախալի առիթով Դնեպր ժամանած հարյուրավոր հայորդիներ` գլխավորությամբ հոգեւորականների եւ համայնքային կառույցների ներկայացուցիչների:  Եկեղեցու օծման արարողությանը հայ համայնքի ուրախությանը բաժնեկից էին Դնեպրոպետրովսկի մարզպետ Վալենտին Ռեզնիչենկոն, Դնեպրոպետրովսկի մարզային Ռադայի նախագահ Գլեբ Պրիգունովը, Դնեպրի քաղաքապետ Բորիս Ֆիլատովը, Ուկրաինայում պապական նվիրակ արքեպիսկոպոս Կլաուդիո Գուջերոտտին, Ուկրաինայի Ուղղափառ, Հռոմեակաթոլիկ, Հունակաթոլիկ եւ Լյութերական եկեղեցիների ներկայացուցիչներ:

Հընթացս օծման սրբազան արարողության, սաղմոսերգության ներքո ջրով եւ գինով լվացվեցին տաճարի Սուրբ Սեղանը եւ օծվելիք սյուները: Այնուհետեւ Հայոց Հայրապետը Սրբալույս Մյուռոնով օծեց եկեղեցու Սուրբ Սեղանը։ Թեմակալ առաջնորդ Տ. Մարկոս եպիսկոպոս Հովհաննիսյանի ձեռամբ օծվեցին  խորանի` չորս ավետարանիչների անունը կրող սյուները: Գերաշնորհ Տ. Նաթան արքեպիսկոպոս Հովհաննիսյանը, Գերաշնորհ Տ. Արշակ եպիսկոպոս Խաչատրյանը եւ Գերաշնորհ Տ. Տաթեւ եպիսկոպոս Հակոբյանը կատարեցին եկեղեցու մնացյալ տասը սյուների օծումը:

Օծման արարողության ավարտին Նորին Սրբություն Գարեգին Բ Կաթողիկոսը հայրապետական իր օրհնությունը բերեց Դնեպրի հայությանը` շնորհավորելով նոր աղոթատան բացման բերկրալի առիթով:

Նորին Սրբությունը ողջունեց եկեղեցու օծման արարողությանը Քրիստոնեական Եկեղեցիների սպասավորների ներկայությունը, ինչպես նաեւ իր գնահատանքը հայտնեց Ուկրաինայի պաշտոնատար անձանց, մարզային եւ քաղաքային իշխանություններին, որ բարյացակամ վերաբերմունքով զորակցություն ու աջակցություն են ցուցաբերում հայ համայնքի ազգային-եկեղեցական կյանքին:

Հայրապետական իր գնահատանքը բերելով Ուկարինայի հայոց թեմի հոգեւոր դասին՝ գլխավորությամբ թեմակալ առաջնորդ Գերաշնորհ Տ. Մարկոս եպիսկոպոս Հովհաննիսյանի` Հայոց Հովվապետը նաեւ իր օրհնությունը բաշխեց թեմի առաջին առաջնորդ Նաթան արքեպիսկոպոսին, հայ համայնքի ղեկավարներին եւ ուկրաինահայ իր բոլոր զավակներինՆորին Սրբությունը աղոթքով հիշեց նաեւ նախորդ թեմակալ առաջնորդ լուսահոգի Տ․ Գրիգորիս արքեպիսկոպոս Բունիաթյանին, ում ջանքերով 2003 թվականին կատարվել էր եկեղեցու հիմնարկեքի արարողությունը։

Ի գնահատություն նվիրյալ ծառայության՝ Ամենայն Հայոց Կաթողիկոսը Մարկոս եպիսկոպոսին շնորհեց պանակե։ Նորաօծ եկեղեցուն Հովվապետի կողմից ընծայվեց Մայր Աթոռ Սուրբ Էջմիածնից բերված՝ Տիրոջ Ս․ Խաչելության պատկեր։

Վերջում Նորին Սրբությունն իր առանձնակի գնահատանքը հայտնեց եկեղեցու կառուցման բարերարներ տեր եւ տիկին Ռաֆայել եւ Շամիրամ Հարությունովներին եւ նրանց զավակներին, ինչպես նաեւ աղոթավայրի կառուցման գործում իրենց ներդրումը բերած երկու տասնյակից ավելի հայորդիներին:

Հայրապետական բարձր գնահատանքի արժանացան նաեւ եկեղեցուն կից «Վարդուհի» ազգային-մշակութային կենտրոնի կառուցման հովանավոր տիար Ալեքսանդր Պետրովսկին եւ եկեղեցու բարեշինությանը մեծապես աջակցած տիար Էմիլ Հարությունյանը:

Այս կապակցությամբ Հայոց Կաթողիկոսը տեր եւ տիկին Ռաֆայել եւ Շամիրամ Հարությունովներին շնորհեց Հայաստանյայց Առաքելական Սուրբ Եկեղեցու «Սուրբ Գրիգոր Լուսավորիչ» պատվո բարձրագույն շքանշանը, տիար Ալեքսանդր Պետրովսկուն՝ «Սուրբ Սահակ-Սուրբ Մեսրոպ», իսկ տիար Էմիլ Հարությունյանին` «Սուրբ Ներսես Շնորհալի» պատվո բարձր շքանշանները:

Արարողության ավարտին նորաօծ եկեղեցում մատուցվեց անդրանիկ Սուրբ եւ Անմահ Պատարագ` ձեռամբ Գերաշնորհ Տ. Նաթան արքեպիսկոպոս Հովհաննիսյանի։

Այնուհետեւ եկեղեցու բակում Ուկրաինայի հայոց թեմի երիտասարդական միության անդամները շուրջպարով ողջունեցին Ամենայն Հայոց Հայրապետին եւ արարողության մասնակիցներին։ Վերջում Նորին Սրբությունը վերստին իր օրհնությունը բաշխեց երիտասարդներին եւ ներկա հավատավոր ժողովրդին։

Ամենայն Հայոց Կաթողիկոսը հյուր եկեղեցականների հետ նաեւ ծանոթացավ «Վարդուհի» ազգային-մշակութային կենտրոնի պայմաններին՝ հաջողություններ մաղթելով նրա օգտաշատ առաքելությանը։