Երեւանի քաղաքապետարանում ընթանում է ավագանու նիստը, որը խոստանում է թեժ լինել: Նշենք, որ օրակարգում ի թիվս այլ հարցերի, երկու հարց կա, որոնք ներկայացնում է «Երկիր ծիրանի» խմբակցությունը:
Դրանցից առաջինը վերաբերում է Վազգեն Սարգսյանի անվան փողոցը ԱՄՆ-ի 28-րդ նախագահ Վուդրո Վիլսոնի անունով անվանակոչելուն, որին դեմ են եւ ՀՀԿ եւ «Ելք» խմբակցությունները:
Երկրորդը՝ 2008 թվականի մարտի 1-ի իրադարձությունների ժամանակ զոհված քաղաքացիների հիշատակին արձան տեղադրելու նախագիծն է:
Հատկանշական է, որ երկու նախագիծն էլ շատ արագ ընդգրկվել են ավագանու այսօրվա նիստի օրակարգում, մինչդեռ նմանատիպ այլ նախագծեր շատ երկար մնում են առկախված:
ՀՀԿ խմբակցության անդամները կարծում են, որ Վուդրո Վիլսոնի անվամբ կարելի է կոչել այլ փողոցներ, ոչ թե դա անել Վազգեն Սարգսյանի փողոցի հաշվին: Նրանց կարծիքով, «Երկիր ծիրանին» պարզապես շոու է ուզում սարքել:
Նշենք, որ Երեւանի ավագանու այսօրվա օրակարգում է 10 հարց, որոնց թվում, բացի վերը նշված երկուսից, ներառված են հետեւյալ հարցեը.
1. Երեւանի ավագանու 3-րդ նստաշրջանի 2-րդ նիստի օրակարգը հաստատելու մասին:
2. Հողի հարկի գծով արտոնություն սահմանելու մասին:
3. Երեւան քաղաքի 2017 թվականի բյուջեի կատարման հաշվետվությունը հաստատելու մասին:
4. Երեւանի զարգացման 2017 թվականի ծրագրի իրականացման հաշվետվության մասին:
5. Երեւանի քաղաքի ավագանու 2017 թվականի դեկտեմբերի 26-ի N93-Ն որոշման մեջ փոփոխություններ կատարելու մասին:
6. Հողամասի նպատակային նշանակությունը փոխելու մասին:
7. Հողամասերի փոխանակությանը համաձայնություն տալու մասին:
8. Գույք ընդունելու մասին: