Brussels Airlines բելգիական ավիաընկերությունը կանոնավոր չվերթներ կիրականացնի դեպի Հայաստան: ՀՀ կառավարությանն առընթեր քաղաքացիական ավիացիայի գլխավոր վարչության մամուլի ծառայության տեղեկացմամբ՝ ավիաընկերությունը համապատասխան թույլտվություն է ստացել եւ Բրյուսել-Երեւան-Բրյուսել երթուղով կանոնավոր չվերթներ կիրականացնի հունիսի 2-ից:

Հունիսի 2-ից հուլիսի 2-ը, ինչպես նաեւ օգոստոսի 29-ից հոկտեմբերի 27-ն ընկած ժամանակահատվածում չվերթները կիրականացվեն շաբաթական մեկ անգամ՝ յուրաքանչյուր շաբաթ, իսկ հուլիսի 3-ից օգոստոսի 28-ն ընկած ժամանակահատվածում՝ շաբաթական 2 անգամ՝ յուրաքանչյուր երեքշաբթի եւ շաբաթ:

Հիշեցնենք, որ կառավարությանն առընթեր ՔԱԳՎ պետ Սերգեյ Ավետիսյանը փետրվարի 28-ին ընդունել էր Brussels Airlines ավիաընկերության փոխնախագահ Հերման Կարպենտյերի գլխավորած պատվիրակությանը: Այս հանդիպման ընթացքում էլ քննարկվել էր ավիաընկերության կողմից Բրյուսել-Երեւան-Բրյուսել երթուղու շահագործումը վերսկսելու հարցը: