Հայտնի է դարձել է, որ Վիտալինա Ցիմբալյուկ–Ռոմանովսկայի բնակարանը եւ բանկային հաշիվը կալանքի տակ են հայտնվել։ Այս մասին հայտարարել է Արմեն Ջիգարխանյանի նախկին կնոջ փաստաբանը, հաղորդում է Dni.ru–ն։
Դատարանը կալանքի տակ է դրել Ցիմբալյուկ–Ռոմանովսկայի՝ Մոլոդոգվարդեյսկայա փողոցի վրա գտնվող բնակարանը։ Այս որոշումն ընդունվել է քրեական գործի հետաքննության շրջանակներում։
Կալանքի տակ է հայտնվել նաեւ Ջիգարխանյանի նախկին կնոջը պատկանող մեկ միլիոն ռուբլին, Ura.ru պարբերականին հաղորդել է փաստաբան Լարիսա Շիրոկովան։ Վիտալինա Ցիմբալյուկ–Ռոմանովսկան կբողոքարկի արդյոք դատարանի որոշումը, հայտնի չէ։
Նշենք, որ Արմեն Ջիգարխանյանի նախկին կնոջ դեմ քրեական գործ է հարուցվել «Անձնական կյանքի գաղտնիությունը» հոդվածի խախտման համար։
Ավելի վաղ հայտնի էր դարձել, որ անհայտ անձինք Ջիգարխանյանի գրասենյակում տեսախցիկներ ու գաղտնալսման սարքեր են տեղադրել, ինչի առթիվ էլ քրեական գործը հարուցվել է։
Լրատվամիջոցների տվյալներով` տեսախցիկները կարող էին դերասանի սենյակում հայտնվել նրա կնոջ` Վիտալինա Ցիմբալյուկ-Ռոմանովսկայայի աջակցությամբ։
Հիշեցնենք, որ կնոջ հետ տեղի ունեցած կոնֆլիկտից հետո Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնաց ավելի քան տասը օր: Հիվանդանոցում նա ասում էր, որ չգիտի, թե ուր է գնալու, քանի որ ամբողջ գույքը վերագրանցել է կնոջ անունով:
