IBM ընկերության կարծիքով՝ արհեստական ինտելեկտի հիման վրա ստեղծված ռոբոտ-մանրադիտակները, բլոքչեյնը, անաչառ արհեստական ինտելեկտը, քվանտային հաշվարկները եւ գաղտնագրությունը հայտնվել են տեխնոլոգիաների ցանկում, որոնք առաջիկա հինգ տարվա ընթացքում մեծ ազդեցություն կունենան մեր կյանքի վրա:
Այս մասին նշվում է ընկերության մամուլի հաղորդագրությունում, հաղորդում է ՏԱՍՍ-ը:
Ցանկը բացում է շրջակա միջավայրի պաշտպանությամբ զբաղվող տեխնոլոգիան. արհեստական ինտելեկտի հիման վրա ստեղծված ռոբոտ-մանրադիտակները կօգնեն օվկիանոսների աղտոտման մակարդակին հետեւել: Ընկերությունը կարծում է, որ այսպիսի փոքր մանրադիտակաները կօգտագործվեն ամբողջ աշխարհում:
Բացի այդ, արագ կզարգանա անաչառ արհեստական ինտելեկտը: Արհեստական ինտելեկտի համակարգերի որակը ուղղակիորեն կախված է տվյալների որակից, որոնց հիման վրա կատարվում է ուսուցումը: Տվյալների կանխակալ ընտրությունը կարող է ոչ օբյեկտիվ արդյունքների հանգեցնել:
Երկու նորամուծությունները կապված կլինեն գաղտնագրության հետ: Նախ, դա գաղտնագրային խարիսխները եւ բլոքչեյներն են, որոնք միասին կարող են երաշխավորել օբյեկտի իսկությունը՝ ստեղծման պահին մինչեւ վերջնական օգտագործողին փոխանցելը: Երկրորդ, ցանցերի գաղտնագրումը նոր հիմնական ճարտարապետություն է, որը տվյալները թաքցնում է ցանցերի բարդ հանրահաշվական կառուցվածքներում:
Ընկերությունը նաեւ կարծում է, որ հինգ տարի անց քվանտային հաշվարկը կդառնա կենցաղի մի մաս, քանի որ կհայտնվեն մասնագետների, ծրագրավորողների եւ ուսանողների նոր կատեգորիաներ: Հաշվողական տեխնիկայի դիպլոմը թերի կլինի առանց քվանտային հաշվարկի ոլորտում գիտելիքների: