Միացյալ Նահանգները խորը մտահոգություն են հայտնել վերջին 48 ժամվա ընթացքում Աֆրինից հաղորդվող լուրերի վերաբերյալ: Այս մասին հայտարարել է պետքարտուղարի պաշտոնակատար Հիզեր Նաուերթը, հաղորդում է «Ամերիկայի ձայնը»:
«Թվում է, որ քաղաքի բնակիչների մեծ մասը, հիմնականում քրդերը, տարհանվել են թուրքական զորքերի հարձակման սպառնալիքի պատճառով», - ասվում է հայտարարության մեջ:
Փաստաթղթում այնուհետ ընդգծվել է, որ կատարվածը միայն խորացնում է Աֆրինի հումանիտար իրավիճակը:
ՄԱԿ-ի գործակալությունները հաղորդում են հարյուր հազարավոր տեղահանված մարդկանց մասին, որոնք անհապաղ օգնության կարիք ունեն, հայտարարել է Նաուերթը: «Մենք նաեւ խորապես մտահոգված ենք Աֆրինում թալանի մասին լուրերով», - ասել է Պետդեպարտամենտի ներկայացուցիչը:
«ԱՄՆ-ը կոչ է անում բոլոր նրանց, ովքեր ներգրավված են հյուսիս-արեւմուտքում (Սիրիա), ներառյալ Թուրքիային, Ռուսաստանին եւ Սիրիայի վարչակարգին, միջազգային հումանիտար կազմակերպություններին թույլ տալ (տարածաշրջան) մարդասիրական օգնություն տրամադրել բռնության արդյունքում տեղահանվածներին:
ԱՄՆ-ն շարունակում է հավատարիմ մնալ ՄԱԿ-ի Անվտանգության խորհրդի 2401 բանաձեւի լիարժեք եւ անհապաղ իրականացմանը», - ասվում է ԱՄՆ ԱԳՆ հայտարարության մեջ:
