Ժիրայր Սեֆիլյանի եւ մյուսների գործով դատավճռի հրապարակումից հետո Երեւան քաղաքի ընդհանուր իրավասության դատարանի Շենգավիթի նստավայրում լարված իրավիճակ է, ոստիկանությունը մեծ թվով ուժեր է կենտրոնացրել դատարանի տարածքում:
NEWS.am-ի թղթակիցը հաղորդում է, որ դատարանում հավաքված ամբաստանյալների բազմաթիվ աջակիցներ «ամոթ» վանկարկումներով են ընդունել հրապարակված դատավճիռը: Ներկաներից մի քանիսի ինքնազգացողությունը դատավճիռը լսելիս նույնիսկ վատացել է:
Այս պահին էլ մարդիկ չեն հեռանում դատարանի տարածքից, նրանք բողոքում են դատավճռի դեմ:
Նշենք, որ մարտի 20-ին «Հիմնադիր խորհրդարանի» առաջնորդ Ժիրայր Սեֆիլյանը դատապարտվեց 10 տարի 5 ամսվա ազատազրկման: Դատավոր Տաթեւիկ Գրիգորյանի հրապարակած դատավճռով Գեւորգ Սաֆարյանն էլ դատապարտվեց 4 տարվա ազատազրկման, դրան գումարվեց առաջին դատավճռի 2 տարի ժամկետը եւ վերջնական պատիժ սահմանվեց 5 տարի 6 ամիս ազատազրկում: Գործով Ներսես Պողոսյանը դատապարտվեց 3 տարի 6 ամիս ժամկետով ազատազրկման, Գալուստ Գրիգորյանը՝ 3 տարի, Հրայր Թոփչյանը՝ 3 տարի, Սասունիկ Կիրակոսյանը՝ 3 տարի 6 ամիս, Հովհաննես Պետրոսյանը՝ 2 տարի ժամկետով ազատազրկման: