Արցախի Ազգային ժողովի պատգամավոր, «Վերածնունդ» խմբակցության ղեկավար Հայկ Խանումյանը ֆեյսբուքյան գրառմամբ անդրադարձել է երկրի նախագահ Բակո Սահակյանի ԱՄՆ այցին եւ արձագանքներին:
Պատգամավորը, մասնավորապես, գրել է. «Արցախյան պաշտոնյաների արտասահմանյան այցերով եւ նրանց հանդիպումներով զարմացող ով հայ ժողովուրդ, 1990-ականներից սկսած Արցախի բոլոր նախագահները (թե՛ Ռոբերտ Քոչարյանը, թե՛ Արկադի Ղուկասյանը, թե՛ Բակո Սահակյանը) տարբեր երկրներում հանդիպել են բարձրաստիճան պաշտոնյաների, առավելապես՝ խորհրդարանակնների: Այս երեք նախագահներն էլ չհրապարակվող հանդիպումներ են ունեցել նաեւ տարբեր երկրների նախագահների հետ:
Արցախի նախագահ Ռոբերտ Քոչարյանը 1990-ականներին հանդիպել է Բրազիլիայի նախագահի եւ Արգենտինայի փոխնախագահի, ինչպես նաեւ Ադրբեջանի առաջնորդ Հեյդար Ալիեւի հետ: Տարբեր երկրների նախագահների հետ հանդիպել է նաեւ Բակո Սահակյանը, որոնց մասին դեռեւս չի խոսվում: 2008թ. Արցախի ԱԳ նախարար Գեորգի Պետրոսյանը հանդիպել է Լիբանանի նախագահ Միշել Սուլեյմանի հետ: Էլ չասեմ խորհրդարանականների մասին, որոնք միշտ համարժեք ընդունելության են արժանանում: Ես իմ պատգամավորության ընթացքում 2 անգամ այցեր եմ ունեցել, առաջին անգամ հանդիպել ենք Եվրախորհրդարանի եւ Բելգիայի տարբեր մակարդակների 2 տասնյակ պատգամավորների: Անցյալ տարի ես հանդիպումներ եմ ունեցել Ֆրանսիայի երկու նահանգապետերի, ԱԺ պատգամավորի եւ Գերմանիայի բունդեսթագի պատգամավորի հետ:
