Ռուսաստանում Հայաստանի դեսպանատանը փոխանցած ՌԴ արտակարգ իրավիճակների նախարարության տվյալներով՝ մարտի 20-ին՝ Մոսկվայի ժամանակով ժամը 9:00-ին Մ-4 «Դոն» (Վորոնեժի մարզ) միջպետական ավտոճանապարհի 673-րդ կիլոմետրին իրար են բախվել Երեւան-Մոսկվա ուղեւորատար ավտոբուսն ու բեռնատարը։ Այս մասին տեղեկանում ենք Ռուսաստանում Հայաստանի դեսպանատան ֆեյսբուքյան էջից։
Ըստ տեղեկությունների՝ «Mercedes» մակնիշի 308 AF 61 պետհամարանիշով ավտոբուսի եւ բեռնատարի բախման հետեւանքով զոհվել է երկու մարդ (ավտոբուսի եւ բեռնատարի վարորդները)։
Բախման պահին ավտոբուսում 50 մարդ է եղել (48 ուղեւոր եւ երկու վարորդ)։
Ավտոբուսի 8 ուղեւորներ հոսպիտալացվել են Պավլովսկի կենտրոնական հիվանդանոց։ Տուժածներից երեքի վիճակը գնահատվում է ծանր, իսկ երկուսինը՝ միջին ծանրության։ Մեկ մարդ բժշկական օգնություն է ստացել եւ դուրս գրվել։ Ներկայում երկու տուժածներ բուժզննում են անցնում։
Մյուս ուղեւորները՝ շուրջ 40 մարդ, տեղափոխվել են Ռուսաստանի Դաշնության Պավլովսկ քաղաքի մոտակայքում գտնվող «Как дома» հյուրանոց:
Հայաստանի դեսպանատունը ճշտում է Վորոնեժի մարզում տեղի ունեցած ճանապարհային պատահարի մանրամասները