Կրեմլում չեն համարում, որ ԱՄՆ նախագահ Դոնալդ Թրամփից Ռուսաստաննի նախագահ Վլադիմիր Պուտինին ընտրություններում հաղթանակի առիթով շնորհավորանքի բացակայությունը կարելի է գնահատել որպես ոչ բարեկամական քայլ: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, փոխանցում է «Դոժդը»:
«Դա չպետք է ոչ բարեկամական քայլ համարել: Պուտինը բաց է ամերիկացի գործընկերների հետ հարաբերությունների կարգավորման համար այնտեղ, որտեղ հետաքրքիր է եւ անհրաժեշտ: Նախագահը արտասահմանյան առաջնորդներից մեծ քանակությամբ շնորհավորանքներ է ստանում: Ինչ-որ մեկը չի կարողանում զանգահարել ժամանակացույցի պատճառով, ինչ-որ մեկը այլ պառտճառով, այստեղ չպետք է ամեն ինչ խտացնել: Եվ վերջապես՝ առավոտը երեկոյից ավելի իմաստուն է»,- ասել է Պեսկովը:
Նա չի կարողացել ասել՝ արդյոք Թրամփից գրավոր շնորհավորանք ստացվե՞լ է: Նրա խոսքով՝ շնորհավորական հեռագրերի ցանկը, որոնք ստացվում են ԱԳՆ խողովակներով, շատ մեծ է:
Պեսկովը հավելել է, որ մարտի 20-ին Պուտինը «շարունակել է իր արտասահմանյան գործընկերներից հեռախոսով շնորհավորանմքներ ստանալ»:
Ավելի վաղ CNN-ը, վկայակոչելով Սպիտակ տան հայտարարությունը, հայտնել էր, որ Դոնալդ Թրամփը Վլադիմիր Պուտինին դեռեւս չի շնորհավորել ընտրություններում հաղթելու համար, իսկ նրանց միջեւ հեռախոսազրույց դեռեւս նախատեսված չէ: Ի պատասխան լրագրողների հարցին՝ ԱՄՆ նախագահի վարչակազմն արդյոք ռուսական ընտրությունները ազատ եւ ազնի՞վ է համարում, Գիդլին ասել էր. «Մեզ արդյունքները չեն զարմացրել»:
Ռուսաստանում նախագահական ընտրությունները տեղի են ունեցել մարտի 18-ին: Արձանագրությունների 99,94 տոկոսի մշակման արդյունքներով՝ Պուտինը ստացել է ձայների 76,69 տոկոսը: