Սիրիայից, Իրաքից, Լիբանանից, Հորդանանից եւ Եգիպտոսից 10 ուսանողներ սովորում են Հայաստանի Ամերիկյան համալսարանում «Scholae Mundi Armenia» հիմնադրամի տրամադրած կրթաթոշակի շնորհիվ: 2019 թվականից վերը նշված երկրների ցանկում կավելանան նաեւ Իրան ու Վրաստանը: Այս մասին հայտարարել են «Ավրորա» հիմնադրամի հիմնադիր Ռուբեն Վարդանյանը եւ նրա կինը` Վերոնիկա Զոնաբենդը՝ UWC Dilijan միջազգային դպրոցի համահիմնադիրը եւ դպրոցի Կառավարիչների խորհրդի նախագահը:
«Մենք պետք է հասկանանք, որ մեզ շրջապատող աշխարհը բազմամշակութային է, բազմազգ: Մենք պետք է սովորենք ապրել այս աշխարհում: Հայերը միշտ էլ տարբերվել են նրանով, որ սովորել են այլ ազգերից եւ կարողացել են հաջողության հասնել, այդ թվում այլ երկրներում», - ասել է Ռուբեն Վարդանյանը:
Վերոնիկա Զոնաբենդն իր հերթին, նշել է, որ Հայաստանում կրթություն ստանալով, այս երեխաները իրենց երկրներ վերադառնալուց հետո կդառնան Հայաստանի յուրօրինակ դեսպանները եւ UWC Dilijan միջազգային դպրոցի փորձը դրա վառ օրինակն է:
Ըստ ամուսինների՝ Scholae Mundi Armenia հիմնադրամը եւ կրթաթոշակները, որոնք այն տրամադրում է օտարերկրացի ուսանողներին, 1915 թվականի Օսմանյան կայսրությունում Հայոց ցեղասպանության զոհերին օժանդակող ժողովուրդների համար յուրատեսակ հարգանքի տուրք է:
«Ժամանակին արաբական եւ լիբանանյան ոչ հարուստ ընտանիքներ ընդունել են հարյուր հազարավոր հայերի: Այդ ժամանակ դա հեշտ չէր, քանի որ առաջին համաշպարհային պատերազմն էր, մի կտոր հաց գտնելը շատ դժվար էր: Բայց նրանք դա արել են եւ հիմա էլ մենք կարող ենք դա անել: Հիմա մենք ամենահարուստը եւ հաջողակը չենք, բայց մենք օգնում ենք ուրիշնեին», - ասել է Ռուբեն Վարդանյանը: