Մարտի 1-ի դեպքերի վերաբերյալ բոլոր այս քննարկումների արդյունքում ի վերջո, արձանագրվեց, որ որեւէ տեղ չկա ապացույց, որ ինչպես 2008-ին հայտարարում էր Ռոբերտ Քոչարյանը, ցուցարարները ավտոբուսի հետեւից կրակել են զինվորների վրա եւ թաքնվել, հետեւաբար նրան պետք է կանչել հարցաքննության: Այս մասին, այսօր՝ մարտի 21-ին, «2008 թվականի մարտի 1-2-ի իրադարձությունների վերաբերյալ» ԱԺ հայտարարության նախագծի քվեարկությունից առաջ հայտարարեց «Ելք» խմբակցության ղեկավար Նիկոլ Փաշինյանը:
ԱԺ պետաիրավական եւ մարդու իրավունքների պաշտպանության հանձնաժողովի նախագահ Գեւորգ պետրոսյանն էլ արձագանքեց. «Այնուամենայինվ, փորձեմ վերջակետ դնել Ռոբերտ Քոչարյանի հարցաքննության շուրջ երկխոսություններին: Բոլոր ձայնագրությունները, որի մասին խոսել է Ռոբերտ Քոչարյանը որպես երկրի նախագահ, քրեական գործում կան: Քրեական գործի նյութերին ծանոթանալու իրավունք ոչ դուք ունեք, պարոն Փաշինյան, ոչ էլ ես, ոչ էլ այստեղ նստածներից որեւէ մեկը: Դրանք քրեական գործի մաս են եւ քննություն իրականացվում է»:
Փաշինյանը պնդեց, որ չի կարող լինել այդպիսի տեսագրություն, որտեղ որեւէ ցուցարար որեւէ մեկի վրա կրակել է, ինչին Կոստանյանը պատասխանեց. «Ես չեմ կարծում, որ պարոն Փաշինյանը կարող է պնդել, թե քրեական գործի նյութերում ինչ կա, կամ ով ինչ ցուցմունք է տվել: Դա ես դիտում եմ որպես անպատասխանատու հայտարարություն»:
«Ելք» խմբակցության պատգամավոր Արտակ Զեյնալյանն էլ տեղեկացրեց, որ նման տեսագրության հարցը բարձրացվել է Եվրոպական դատարանում եւ այդպիսի տեսագրություն չի ներկայացվել այնտեղ. «Պաշտոնապես հայտարարվել է, որ չկա նման տեսագրություն»,-ասաց նա:
«Ծառուկյան» խմբակցությունից Արարտ Զուրաբյանը, որ 2008 թվականին Լեւոն Տեր-Պետրոսյանի աջակիցների թվում էր, ասաց. «Ես կասկած չունեմ, որ ընդդիմության կողմից որեւէ կրակոց չի եղել: Ու այդ դեպքում հարց է առաջանում, եթե կրակող չի եղել, իշխանությունն ինչու է զենք կիրառել»:
Հիշեցնենք, որ ԱԺ պետաիրավական եւ մարդու իրավունքների պաշտպանության հանձնաժողովը բացասական եզրակացություն էր տվել հայտարարության նախագծին, սակայն այդուհանդերձ, այն ընդգրկվել էր ԱԺ նիստերի օրակարգում:
- «Ելքն» առաջարկում է մարտի 1» դեպքերի 10-րդ տարելիցի կապակցությամբ ԱԺ-ում հայտարարություն ընդունել. Տեքստ
- Լսումներ ԱԺ-ում. օրակարգում «Մարտի 1»-ի իրադարձությունների վերաբերյալ ԱԺ հայտարարությունն է