Ջրամբարների ներկայիս պաշարները կարող են որոշակի ռիսկեր առաջացնել ջրամատակարարման տեսանկյունից: Այս մասին, այսօր՝ մարտի 22-ին, Կառավարության նիստում հայտարարել է վարչապետ Կարեն Կարապետյանը:
Նա ոռոգման շրջանի նախապատրաստման աշխատանքների վերաբերյալ հանձնարարական է տվել:
«Կառավարությունում կազմակերպված խորհրդակցության ընթացքում ջրային տնտեսության պետական կոմիտեն ներկայացրել է ջրամբարների լցվածության տվյալները եւ 2018-ին ոռոգման շրջանի նախապատարստական աշխատանքները: Քննարկվել են նաեւ ըստ մարզերի ոռոգման պայմանները եւ առաջնահերթությունները»,-ասաց նա:
Հաշվի առնելով, որ ջրամբարների ներկայիս պաշարները կարող են որոշակի ռիսկեր առաջացնել ջրամատակարարման տեսանկյունից, վարչապետը ջրային տնտեսության պետական կոմիտեի նախագահին հանձնարարեց 7-օրյա ժամկետում շահագրգիռ մարմինների հետ մշակել եւ ներկայացնել ֆինանսների նախարարութուն շարժական պոմպային սարքավորումների, խորքային պոմպերի ձեռքբերման, չշահագործվող պոմպային հորերի վերականգնման, ինչպես նաեւ նորերի հորատման նախագծային աշխատանքների ֆինանսական հաշվարկները՝ հաշվի առնելով գյուղացիական տնտեսությունների ոռոգման ջրի պահանջարկի ապահովումը:
Կարեն Կարապետյանը Ֆինանսների, տարածքային կառավարման եւ զարգացման, բնապահպանության նախարարին հանձնարարեց առաջին կետով նշված փաթեթն ստանալուց հետո 10-օրյա ժամկետում ջրային տնտեսության պետական կոմիտեի հետ համատեղ նախաձեռնել համապատասխան գնումների եւ աշխատանքների մեկնարկման գործընթացը եւ դրանք ավարտին հասցնել ապրիլի 16-ին, միաժամանակ ապահովելով օրենքով սահմանված շրջակա միջավայրի գնահատման փորձաքննության կատարումը հնարավորինս սեղմ ժամկետներում:
«Գյուղատնտեսության, տարածքային կառավարման եւ զարգացման նախարարներին, ջրային տնտեսության պետական կոմիտեի նախագահին եւ մարզպետներին՝ երեք ամսվա ժամկետում ամփոփել ջրային ոլորտում առկա ներդրումային ծրագրերը, որոշել 2019 թվականի առաջնահերթությունները եւ համապատասխան առաջարկություններ ներկայացնել կառավարության աշխատակազմ։ Ինչպես նաև, ոռոգման սեզոնի նախապատրաստական աշխատանքների պլանավորումն, այսուհետ սկսել աշուն-ձմեռ ժամանակահատվածում», - ընդգծեց վարչապետը: