Առանձնապես խոշոր չափերով խարդախություն կատարելու համար 4 տարվա ազատազրկման դատապարտված զինվորական կոմիսարի տեղակալ Վարդգես Համբարձումյանի գործով վերաքննիչ բողոք է ներկայացրել մեղադրողը:
Ըստ մեղադրանքի՝ Համբարձումյանը կաշառք ստանալու պատրվակով 2017թ.-ի սեպտեմբերին Ա.Վ.-ից պահանջել է 28 հազար դոլար, իսկ օրեր անց իր աշխատասենյակում վստահությունը չարաշահելու եղանակով վերջինից ստացել է դրա մի մասը և հափշտակել 10 հազար ԱՄՆ դոլարը:
Երեւան քաղաքի ընդհանուր իրավասության դատարանը Համբարձումյանին մեղավոր էր ճանաչել Քրեական օրենսգրքի 178-րդ հոդվածի 3-րդ մասի 1-ին կետով և դատապարտել ազատազրկման` 4 տարի ժամկետով` առանց գույքի բռնագրավման։
Մեղադրող Սարգսյանը, սակայն, համաձայն չէ դատավճռի հետ եւ դիմել է Վերաքննիչ քրեական դատարան: Նա պահանջում է բեկանել առաջին ատյանի կայացրած դատավճիռն ու ամբաստանյալ Վարդգես Համբարձումյանի նկատմամբ կիրառել համաչափ պատիժ` 5 տարի 3 ամիս ժամկետով ազատազրկում:
