«Սասնա ծռերին» աջակցելու մեջ մեղադրվող Կարո Եղնուկյանի ինքնազգացողությունն այսօր դատարան բերելուց հետո կրկին վատացել է: Նախագահող դատավոր Արտուշ Գաբրիելյանը Երեւանի ընդհանուր իրավասության դատարանի Ավանի եւ Նոր Նորքի նստավայր շտապօգնություն հրավիրեց նրա համար:
Եղնուկյանի պաշտպան Տիգրան Հայրապետյանը հայտարարեց, որ նախորդ դատական նիստին դատարանը որոշեց դատաբժշկական փորձաքննություն անցկացնել, սակայն այսօր առանց փորձաքննության արդյունքների Եղնուկյանին նորից դատարան են բերել:
«Դուք ի՞նչ եք ուզում անել, ուզում եք մահվան դուռը հասցնե՞լ Եղնուկյանին։ Ամեն անգամ ես հայտարարում եմ, որ Եղնուկյանի վիճակը կտրուկ վատանում է, երբ հայտնվում է դատարանում, դուք ոչինչ չեք ձեռնարկում այդ ուղղությամբ»,- ասաց Տիգրան Հայրապետյանը։
Հանրային պաշտպան Անուշ Մխիթարյանն էլ հայտարարեց, որ Կարո Եղնուկյանի հոգեբանական վիճակով է պայմանավորված նրա ինքնազգացողության վատացումը, եւ այդ վիճակով դատական նիստերը շարունակելն ուղղակի պետական միջոցների վատնում է։
«Առանց ամբաստանյալի չի կարելի դատական նիստեր անցկացնել, պետք է այս հարցը կարգավորել, եւ դուք ամեն անգամ, առանց այս հարցը լուծելու, այսքան մարդկանց բերում, հասցնում եք այստեղ ու դատական նիստերը չեն անցկացվում։ Սա ե՛ւ պետական միջոցների, ե՛ւ մեր ժամանակի անտեղի վատնում է»,- հայտարարեց հանրային պաշտպանը։
Դատավոր Արտուշ Գաբրիելյանը 30 րոպե ընդմիջում հայտարարեց՝ բժշկի եզրակացությունը ստանալու համար։
Նշենք, որ Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի և Խաչատուր Գիչյանի առանձնացված մասով գործը:
