Հայաստանի քննչական կոմիտեի Արմավիրի մարզային քննչական վարչությունում քրեական գործ է հարուցվել՝ Արմավիր գյուղում 22-ամյա Նարեկ Պողոսյանի սպանության դեպքի առիթով: Գործով ձերբակալված կա: Այս մասին տեղեկանում ենք ՀՔԾ մամուլի ծառայությունից:
Մարտի 21-ին ժամը 21:55-ին «Արմավիր» ԲԿ-ից հաղորդում է ստացվել առ այն, որ «կրծքավանդակի կտրած-ծակած թափանցող վերք» ախտորոշմամբ բուժօգնության է տեղափոխվել 1996թ. ծնված Նարեկ Պողոսյանը: Ավելի ուշ՝ մարտի 22-ի կեսգիշերին, երիտասարդը, գիտակցության չգալով, մահացել է:
Անմիջապես մեկնել է քննչական-օպերատիվ խումբը եւ ձեռնարկել անհետաձգելի միջոցառումներ՝ դեպքի հանգամանքները պարզելու համար։ Արդյունքում փաստական տվյալներ են ձեռք բերվել, որ Ն.Պողոսյանը կյանքի հետ անհամատեղելի մարմնական վնասվածքներն ստացել է Արմավիր գյուղում, կենցաղային հարցերի շուրջ ծագած վիճաբանության ժամանակ: Նախնական տվյալներով՝ Ն.Պողոսյանին կրծքավանդակի եւ որովայնի շրջանում դանակի 7 հարված է հասցվել:
Դեպքի առիթով ՀՀ ՔԿ Արմավիրի մարզի քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով: Պարզվել է ենթադրյալ հանցագործություն կատարած անձի ինքնությունը, ով Արմավիր գյուղի բնակիչ է՝ ծնված 1999թ.: Նա ձերբակալվել է եւ հարցաքննվել դեպքի հանգամանքների շուրջ: Նախաքննությունը շարունակվում է: