Ուկրաինայի գերագույն ռադայի կանոնակարգային կոմիտեն կողմ է արտահայտվել պատգամավոր Նադեժդա Սավչենկոյին անձեռնմխելիությունից զրկելուն եւ նրա կալանավորմանը, հաղորդում է «Ուկրաինսկայա պրավդա»–ն։
Կոմիտեի պատգամավորները միաձայն հիմնավոր են համարել գլխավոր դատախազ Յուրի Լուցենկոյի ներկայացրած պատճառները։ Վերջինս բացատրել է, որ Սավչենկոն չի հրաժարվել հանցագործության կատարումից եւ չի դադարեցրել հարաբերությունները մյուս մասնակիցների հետ։ Բացի այդ, նրա կարծիքով, Սավչենկոն կարող է թաքնվել մինչդատական հետաքննություն իրականացնող մարմիններից, ինչպես նաեւ ազգային եւ հանրային անվտանգության դեմ ուղղված նոր հանցագործություն գործել։