Ցանկացած գործողության շարժառիթը պետք է դառնա քննարկման առարկա, մինչդեռ «Սասնա ծռերի» գործերով քննարկման առարկա չի դարձել ապստամբելու բնական իրավունքը: Այս մասին, այսօր՝ մարտի 22-ին, լրագրողների հետ հանդիպման ժամանակ նշել է «Սասնա ծռերի» գործով փաստաբան Արայիկ Պապիկյանը:
Նրա խոսքով, քանի դեռ այս իրավունքը չի քննարկում դատարանի, մեղադրանքի կողմից, մնացած բոլոր քննարկումները որ արվում է դատարանում, ժամանակի վատնում է բոլորի համար:
Պապիկյանը նշեց, որ ՊՊԾ գնդի գրավման հաջորդ օրը ՀՀ նախագահ Սերժ Սարգսյանը խոսել է վրեժխնդրության մասին: «Թեեւ նա ասաց, որ անձնական վրեժխնդրություն թույլ չի տալու, բայց երբ երկրի առաջին դեմքի կողմից նման արտահայտություն է արվում… այսինքն եղել է նման մոտեցում, եւ ենթադրվում է, որ այդ մոտեցումը դրսեւորովում է նաեւ անձնական վրեժխնդրության ձեւով: Օրինակ «Սասնա ծռերից» մի քանիսին դատարանում խոշտանգելը, որ երբեք նման բան չէր եղել նախկինում, նրանցից մի քանիսի նկատմամբ դաժան վերաբերմունքը ՔԿՀ-ներում, հենց այդ մասին է խոսում»,-ասաց փաստաբանը: