Մրցունակ մարդիկ ունենալու համար պետք է Հայաստանում ստեղծել չընհատվող, անհատական կրթահամակարգ: Այս հարցի քննարկումն է եղել Ռուբեն Վարդանյանի հետ տեղի ունեցած բարեգործական ընթրիքի ժամանակ: Այս մասին NEWS.am-ին տեղեկացրեց ընթրիքի մասնակից Menu Group-ի համահիմնադիր Վահան Քերոբյանը:

«Ռուբեն Վարդանյանի հետ ընթրիքին բավականին շատ ժամանակ տրամադրեցինք երկու հարցի քննարկմանը. ապագայում էկոհամակարգերի մրցակցության մեջ Հայաստանի ու Հայաստանյան քաղաքների մրցունակ լինելուն՝ նաև կրթության տեսանկյունից: Կարծում եմ, որ մրցունակ մարդիկ ունենալու համար պետք է Հայաստանում ստեղծել չընհատվող, անհատական կրթահամակարգ», -ասաց Քերոբյանը:

Ըստ նրա՝ Բարի Ընթրիք նախագծի կազմակերպած բարեգործական ընթրիքն իր բնույթով նման է աշխարհի ամենահաջողակ ինվեստոր Ուորեն Բաֆեթի ամենամյա ճաշի աճուրդին: ս «Ես վաղուց եմ հետևում ու «նախանձում» այդ սովորույթին: Ուստի, թե բիզնես-միջավայրի , թե բարեգործական միջավայրի զարգացման տեսանկյունից ես խիստ հետաքրքրված եմ Բարի Ընթրիք նախագծի կայացման և զարգացման մեջ: Ինչո՞ւ եմ հաճախ մասնակցում: Բացառապես անձնական հետաքրքրվածությունից, այսինքն՝ առաջին անգամ որպես «աճուրդի պարագա» եմ մասնակցել նախագծի ղեկավարների խնդրանքով, իսկ աճուրդներին հաղթելու մոտիվացիան բացառապես ընթրիքի հյուրի անձի նկատմամբ անձնական և բիզնես հետաքրքրությունն է»,- նշեց Menu Group-ի լիդերը: