Երեւանի ընդհանուր իրավաասության դատարանի Շենգավիթի նստավայրում այսօր՝ մարտի 22-ին, կաշառք վերցնելու մեջ մեղադրվող Շենգավիթի նախկին դատավոր Իշխան Բարսեղյանի գործով դատական նիստն անցնում է լարված մթնոլորտում։
Դատավոր Վաչե Մարգարյանին ինքնաբացարկի միջնորդություն ներկայացնելուց հետո դատարանը արձանագրեց, որ նախկինում եւս նման միջնորդություն ներկայացվել է, մերժվել է եւ դատարանը խորհրդակցական սենյակ չի գնում՝ նոր որոշում կայացնելու։
Դատավորի այս հայտարարությունը հունից հանեց Իշխան Բարսեղյանին, ով հայտարարեց, որ դատարանը «ապօրինություն» է անում՝ խորհրդակցական սենյակ չգնալով։
«Դատավոր ես, պարտավոր ես գնալ խորհրդակցական սենյակ, ապօրինություն մի արա, մարդ ես, արդարադատություն ես իրականացնում, դու հասկանում ես, թե դու ով ես։ Լավ չեմ զգում, 5 րոպե ընդմիջում հայտարարեք, չես հասկանում, լավ չեմ զգում, շտապօգնություն կանչեք։ Ամոթ է, մարդ Աստծո, դատավոր եք դատում, ամոթ է։ Ողբամ զքեզ հայոց աշխարհ, արա»,- բղավում էր Իշխան Բարսեղյանը
Դատավորը Իշխան Բարսեղյանին հորդորեց զգացմունքներիին տուրք չտալ եւ նրա նկատմամբ դատական սանկցիա կիրառեց՝ հեռացնելով դահլիճից։
Նշենք, որ Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով՝ կաշառք ստանալը: Կաշառքի միջնորդություն կատարելու համար փաստաբան Էլզա Զաքարյանին էլ մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ Կաշառքի միջնորդությունը: Իշխան Բարսեղյանի նկատմամբ որպես խափանման միջոց ընտրվել է կալանավորումը:Նշենք, որ ըստ ԱԱԾ տարածած հաղորդագրության՝ քաղաքացիական գործով կողմի օգտին որոշում կայացնելու համար դատավորը պահանջել եւ Երեւանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո: