Նախկին ռուսական լրտես Սերգեյ Սկրիպալը եւ նրա դուստր Յուլիան նյարդային թույնի թունավորման պատճառով կարող են ուղեղի երկարատեւ վնասում ունենալ: Այս մասին լսումների ժամանակ հայտարարել է բրիտանացի դատավոր Դեվիդ Ուլյամսը, հաղորդում է Reuters-ը:
Նրա խոսքով՝ հայտնի չէ, թե երբ Սկրիպալները կապաքինվեն: Նա նաեւ նշել է, որ թունավորումը կարող է ազդել նրանց մտավոր ունակությունների վրա: «Բժշկական թեստերը ցույց են տալիս, որ իրենց մտավոր կարողությունները կարող են վտանգի տակ հայտնվել անհայտ, դեռ չորոշված աստիճանի», - ասել է նա:
Ներկայումս Սկրիպալները ուժեղ հանգստացնող դեղերի ազդեցության տակ են, ի վիճակի չեն շփվել եւ դժվար է ասել, թե երբ նրանց մտավոր ունակությունները կվերականգնվեն: Նրանց ֆիզիկական վիճակը գնահատվում է որպես կայուն:
Հիշեցնենք, որ մարտի 4-ին ԳՀՎ 66-ամյա նախկին գնդապետ Սերգեյ Սկրիպալը եւ նրա 33-ամյա դուստր Յուլիան ենթարկվել են անհայտ նյարդային թույնի ազդեցության: Նրանց անգիտակից վիճակում գտել էին Սոլսբերիի The Maltings առեւտրի կենտրոնի նստարանին:
Բրիտանական կողմը Ռուսաստանին է մեղադրել Սկրիպալի հարձակման մեջ: Մոսկվան հերքում է բոլոր մեղադրանքները: