Եվրամիության երկրները կհամակարգեն իրենց գործողությունները՝ ըստ Սոլսբերիում տեղի ունեցած միջադեպի հետեւանքների, որտեղ թունավորվել էր ռուսական Գլխավոր հետախուզության վարչության նախկին գնդապետ Սերգեյ Սկրիպալը։ Այս մասին ասված է Եվրամիության երկրների գագաթաժողովի եզրափակիչ փաստաթղթում։
«Եվրամիության երկրները կհամակարգեն իրենց գործողություններն այն հետեւանքներից ելնելով, որոնք ի հայտ կգան Ռուսաստանի իշխանությունների կողմից տրված պատասխանների լույսի ներքո»,- նշված է հաղորդագրությունում։
Հիշեցնենք, որ հետախուզության գլխավոր վարչության նախկին գնդապետ, պետական դավաճանության համար դատապարտված Սերգեյ Սկրիպալին ու նրա դստերը մարտի 4-ին գտել էին անգիտակից վիճակում Սոլսբերիում։ Բրիտանական կառավարության տվյալներով, նրանց թունավորել են ռուսական արտադրության նյարդապարալիտիկ նյութով։ Սկրիպալը ապաստան էր ստացել Բրիտանիայում Ռուսաստանի ու ԱՄՆ-ի միջեւ հետախույզների փոխանակությունից հետո, երբ ՌԴ-ին էին արտահանձնել տասը մարդու։
Բրիտանական կողմը պնդում է, որ թունավորմանն առնչություն ունի Ռուսաստանը։ Այս կապակցությամբ Բրիտանիայի վարչապետ Թերեզա Մեյն անցած չորեքշաբթի հայտարարել է ՌԴ-ի դեմ մի շարք միջոցառումների մասին, այդ թվում՝ 23 ռուս դիվանագետների արտաքսման ու բարձր մակարդակի վրա բոլոր երկկողմանի շփումները սառեցնելու մասին։ Ռուսաստանը կտրականապես հերքում է իր մասնակցությունը թունավորմանը, ՌԴ ԱԳՆ-ն համարժեք քայլով է պատասխանել:
