Շվեյցարիայում Հայաստանի դեսպան Շառլ Ազնավուրը կարեւորում է Լեռնային Ղարաբաղի եւ Ադրբեջանի շփման գծում հետաքննության մեխանիզմների ձեւավորումը, եւ հույս ունի, որ Ադրբեջանը չի խոչընդոտի ԵԱՀԿ Մինսկի խմբի համանախագահների կողմից առաջարկված այս մեխանիզմների հաստատմանը: Աշխարհահռչակ շանսոնյեն այս մասին ասել է ՄԱԿ-ի ժնեւյան գրասենյակի կողմից հրատարակվող «UN Special» ամսագրին տված ընդարձակ հարցազրույցում:
Ազնավուրն անդրադարձել է ԵԱՀԿ ՄԽ-ի կողմից հակամարտության խաղաղ կարգավորման ուղղությամբ գործադրված ջանքերին, Հայաստանի եւ Ադրբեջանի նախագահների վերջին գագաթնաժողովը Շվեյցարիայում հյուրընկալելուն, ղարաբաղյան հակամարտության կարգավորման ընթացիկ հրամայականներին՝ կարեւորելով զինադադարի հաստատման եւ ամրապնդման վերաբերյալ 1994թ. եւ 1995թ. ստորագրված եռակողմ անժամկետ համաձայնագրերի պահպանմանը:
«Առանձնահատուկ երեկո Վիկտորիա հոլ սրահում» վերնագրված հարցազրույցը նվիրված է ՄԱԿ-ին Հայաստանի անդամակցությանը, ինչպես նաեւ Հայաստանի եւ Շվեյցարիայի միջեւ դիվանագիտական հարաբերությունների հաստատման 25-ամյակի կապակցությամբ 2017թ. նոյեմբերի 24-ին Շվեյցարիայում Հայաստանի դեսպանության կողմից կազմակերպված մեծ համերգին:
Դեսպան Ազնավուրն անդրադարձել է ՄԱԿ-ին Հայաստանի անդամակցության կարեւորությանը եւ կազմակերպության շրջանակում Հայաստանի հանձնառությանը` իր մասնակցությունը բերելու համընդհանուր արժեքների վրա հիմնված համերաշխ եւ խաղաղ ապագա կերտելու միջազգային հանրության ջանքերին։ Շվեյցարիայում ՀՀ մշտական ներկայացուցիչը խոսել է նաեւ Հայաստանի ակտիվ ներգրավվածության մասին ՄԱԿ-ում եւ նրա գործակալությունների շրջանակներում ամենատարբեր ուղղություններով իրականացվող աշխատանքներին։
Անդրադարձ է կատարվել Հայաստանի մասնակցությանը ՄԱԿ կանխարգելման օրակարգին, մասնավորապես՝ ՄԱԿ-ի Մարդու իրավունքների խորհրդում 2015թ. Հայաստանի նախաձեռնած Ցեղասպանության կանխարգելման վերաբերյալ բանաձևին, որը ցեղասպանությունը դատապարտում է որպես մարդկության դեմ ամենասարսափելի հանցագործություն։
ՀՀ մշտական ներկայացուցիչն անդրադարձել է նաեւ 2018թ. հոկտեմբերին Երևանում կայանալիք Ֆրանկոֆոնիայի 17-րդ գագաթնաժողովին, որը «հավակնում է դառնալ նորանկախ Հայաստանի պատմության ամենամեծ միջոցառումը»:
Հարցազրույցի էլեկտրոնային տարբերակը կարելի է գտնել այստեղ:
