Որեւէ մեկը չի ժխտում Ժիրայր Սեֆիլյանի մասնակցությունն Արցախյան հերոսամարտին: Այս մասին այսօր՝ մարտի 23-ին Ազգային ժողովում լրագրողների հետ զրույցում հայտարարեց ՀՅԴ խմբակցության քարտուղար Աղվան Վարդանյանը:
«Ես դատարանների որոշումները չեմ մեկնաբանում, կան համապատասխան ընթացակարգեր, եթե կողմը համաձայն չէ, կարող է դիմել հաջորդ ատյաններին»,-ասաց Վարդանյանը՝ նշելով, որ պաշտպանները կարող են դիմել Վերաքննիչ դատարան եւ մինչեւ վերջ գնալ:
Հարցին՝ արդյո՞ք սա քաղաքական հաշվեհարդար չէր իշխանությունների կողմից, Վարդանյանը կրկնեց, որ չի մեկնաբանում դատարանների որոշոումները:
Աղվան Վարդանյանը, միաժամանակ, նշեց, որ որեւէ մեկը չի ժխտում Սեֆիլյանի մասնակցությունն Արցախյան հերոսամարտին, սակայն մարդը կյանքի տարբեր փուլերում ունենում է տարբեր գործունեություններ: Ինչ վերաբերում է Սեֆիլյանի անունը պատմության դասագրքերից հանելուն, ապա, նրա խոսքով, տեղյակ չի եղել, որ նրա անունը եղել է գրքերում, որ հիմա էլ հանում են:
Անդրադառնալով անկախ Հայաստանի պատմության մեջ քաղբանտարկյալների առկայությանը, ՀՅԴ խմբակցության ղեկավարն ասաց, որ եղել են քաղբանտարկյալներ, սակայն անուններ չնշեց:
Հիշեցնենք, որ արդարադատության նախարար Դավիթ Հարությունյանը նախօրեին մեզ հետ զրույցում հայտարարել էր, որ Հայաստանում քաղբանտարկյալներ չեն եղել:
