Իրանն ու Վրաստանը հայ արտահանողների համար առավել ռիսկային երկրների շարքում են: Այս մասին են վկայում Հայաստանի արտահանման ապահովագրական գործակալության՝ ռիսկերի՝ ըստ երկրների դասակարգման տվյալները:
Լրագրողների հետ հանդիպման ժամանակ գործակալության Տնօրինության գործադիր տնօրեն, նախագահ Արմեն Շահնազարյանը, պատասխանելով NEWS.am-ի թղթակցի հարցին, թե չվճարման տեսանկյունից որ շուկաներն են առավել ռիսկային հայ գործարարների համար, նշեց, որ, ռիսկերի՝ ըստ երկրների դասակարգման համաձայն, ամենաանվտանգն են ԱՄՆ-ն, Մեծ Բրիտանիան, ԱՄԷ-ն, Բելգիան, Գերմանիան, Իտալիան, Լեհաստանը, Լիտվան, Կանադան, Նիդեռլանդները, Չեխիան, Չինաստանը, Ֆրանսիան եւ եվրոպական մի շարք երկրներ: Ըստ ռիսկայնության՝ երկրորդ տեղում են Եվրասիական տնտեսական միության երեք երկրները՝ Ռուսաստանը, Բելառուսը եւ Ղազախստանը, եւ, հաշվի առնելով տնտեսության զարգացման եւ որոշ չափով նաեւ բացասական մեսեջների դինամիկան՝ ԱՊՀ երկրները, ինչպես նաեւ Հնդկաստանը:
Հատկանշական է, որ հայաստանյան արտահանողների համար հարեւան Վրաստանի շուկան երրորդ աստիճանի ռիսկեր ունի, ինչպես Բուլղարիան, Բրազիլիան, Սերբիան եւ Հարավային Աֆրիկան, իսկ Հայաստանի խոշորագույն գործընկեր Իրանը դասակարգվում է որպես ռիսկերի չորրորդ աստիճանի շուկա` Տաջիկստանի, Եգիպտոսի եւ Հորդանանի հետ միասին:
Նույն դասին է պատկանում է նաեւ Ղազախստանի շուկամ: «Գործակալությունը կարեւոր նշանակություն է տալիս սպառման երկրներում ռիսկերի աստիճանին, քանի որ ապահովագրություն է տրամադրում գնորդներից. Խոսքը կոնկրետ երկրի բիզնեսի մասին է, այն մասին, թե ինչպիսին են կոնկրետ տնտեսության, կոնկրետ երկրի ռիսկերը»,- նշեց Արմեն Շահնազարյանը: