Երեւանի գլխավոր ճարտարապետ Տիգրան Բարսեղյանը տեսել է Սասնա ծռերի աջակից «Հաց բերող» Արթուր Սարգսյանի հիշատակը հավերժացնող հուշարձանի նախագիծը եւ չի հավանել։ Այս մասին նա ասաց NEWS.am–ի հետ զրույցում։ հիշեցնենք, որ ճարտարապետներ Անահիտ Թարխանյանը եւ Արմինե Ղազարյանը վերջերս ներկայացրեցին հուշարձանի նախագիծը։ Այն սյուների ամբողջություն է, որոնց ծայրերը թափանցիկ ապակիներ են։ Անահիտ Թարխանյանի մեկնաբանմամբ՝ այդ ապակին խորհրդանշում է չարությունը, որը Արթուրի հոգով դուրս է մղվում բարության ու լույսի վերածված։ Թարխանյանն ասել էր, որ այն ներկայացնելու են քաղաքապետարան եւ ակնկալում են, որ թեկուզ տարիներ անց քաղաքապետարանը թույլ կտա այն տեղադրել Մաշտոցի պուրակում։
Երեւանի ճարտարապետ Տիգրան Բարսեղյանը մեզ հետ զրույցում ասաց՝ դեռ չի քննարկվել հարցը քաղաքապետարանում։
«Ես տեսել եմ նախագիծը, չեմ կիսում իր կարծիքը գեղագիտական պատկերացումներով։ Ես դա ասել եմ հեղինակին։ Իմ համար անընդունելի եւ ցածր գեղագիտական մակարդակով է արված այն, եւ ոչ իր տեղում տեղադրված մի աշխատանք է։ Ես սա ասել եմ հենց առաջին անգամ, երբ հեղինակը կիսվեց իմ հետ»,–ասաց Տիգրան Բարսեղյանը՝ շեշտելով, թե դեմ է այն Մաշտոցի պուրակում տեղադրելու գաղափարին։
«Արձանի գաղափարը իմ մեջ չեմ վերլուծել եւ նպատակահարմար չեմ համարում։ Երբ կներկայացվի քաղաքապետարան, կքննարկենք ու արդյունքը հայտնի կլինի։ Ես չեմ գտնում, որ այդ հուշարձանը տեղադրվի»։
Հիշեցնենք, որ Արթուր Սարգսյանը 2016 թվականի հուլիսին, երբ Սասնա ծռերը զինված գրավել էին ոստիկանության ՊՊԾ գունդը, Արթուր Սարգսյանը ճեղքելով ոստիականական պատնեշը, սնունդ էր հասցրել ծռերին։ Չնայած առողջական խնդիրներին, նրան եւս ազատազրկեցին, ինչի հետեւանքով վատթարացավ առողջությունը։ պաշտպանի եւ հանրային ճնշման ներքո Արթուր Սարգսյանը ազատ արձակվեց, սակայն օրեր անց մահացավ։
