Վթարը Գուդաուրի լեռնադահուկային հանգույցում տեղի էր ունեցել օպերատորի մեղքով, որը լարման տատանումից հետո հրահանգների համաձայն չէր գործել: Այս մասին մամուլի ասուլիսի ժամանակ հայտարարել է Վրաստանի էկոնոմիկայի եւ կայուն զարգացման նախարար Դմիտրի Կումսիշվիլին, փոխանցում է Sputik-Georgia-ն:
Միջադեպը տեղի էր ունեցել մարտի 16-ին Վրաստանի հայտնի լեռնադահուկային հանգստավայրում: Համակարգի՝ շարքից դուրս գալու հետեւանքով ճոպանուղու նստարանների մի մասը, որոնց վրա զբոսաշրջիկներ կային, բարձր արագությամբ ներքեւ էին սահել և բախվել միմյանց: Ոչ բոլորն էին հասցրել ժամանակին ցատկել, սակայն, բարեբախտաբար, զոհեր չկային: Տուժել է Ուկրաինայի, Ռուսաստանի, Շվեդիայի եւ Վրաստանի 11 քաղաքացի:
Տեսագրությունների շնորհիվ պարզվել է, որ մարտի 16-ին լարման տատանում է տեղի ունեցել, ինչը հանգեցրել է ճոպանուղու ընթացքի կանգնեցմանը: Դրանից հետո օպերատորը պետք է գործեր ըստ որոշակի ցուցումների: Սակայն քանի որ նա լարման տատանումներից հետո նա չէր իրականացրել իր մի շարք պարտականությունները, ճոպանուղու վրա վթար էր տեղի ունեցել:
«Օպերատորը պետք է տեղափոխեր այդ ճոպանուղին դիզելային գեներատորի վրա եւ այնուհետեւ զբոսաշրջիկներին հասցներ այնտեղ, որտեղ նրանք կարող էի իջնել նստարաններից, որպեսզի այն ճոպանուղին դատարկ լիներ: Ցավոք, այսօր գոյություն ունեցող եզրակացության համաձայն, օպերատորը սխալ է թույլ տվել: Այն, ինչ նա արել է, չի համապատասխանել հրահանգներին: Մեր եզրակացությունը կփոխանցվի Ներքին գործերի նախարարությանը, որը շարունակում է հետաքննությունը», - ասել է Կումսիշվիլին: Նա նաեւ հավելել է, որ վթարի օրը «Սադզելե» ճոպանուղու օպերատորը հեռացվել է աշխատանքից:
Գուդաուրիում տեղի ունեցած վթարի եզրակացությունը նախապատրաստվել է վրացական իշխանությունների հրավերով երկրում գտնվող ֆրանսիական Bureau Veritas միջազգային ընկերության մասնագետների կողմից: Քրեական գործը հարուցվել է Վրաստանի Քրեական օրենսգրքի 275-րդ հոդվածի համաձայն, որը երկաթուղային, ջրային, օդային կամ ճոպանուղային տրանսպորտի երթեւեկության կամ շահագործման անվտանգության կանոնների խախտում է ենթադրում: Մեղավորին մինչեւ 5 տարվա ազատազրկում է սպառնում:
