ԱՄՆ իշխանությունները դիտարկում են չինական հեռահաղորդակցության ընկերությունների, այդ թվում՝ Huawei ընկերության արտադրանքը գնող բջջային եւ ինտերնետ կապի ամերիկյան օպերատորներին սուբսիդիաներից զրկելու հնարավորությունը, գրում է ՏԱՍՍ-ը։

ԱՄՆ իշխանությունները պնդում են, որ այնպիսի չինական ընկերություններ, ինչպիսիք Huawei-ն եւ ZTE-ն են, համագործակցում են Չինաստանի հատուկ ծառայությունների հետ։ Ավելին, սարքավորումների վրա հատուկ ծրագրեր են տեղադրվել, որոնք թույլ են տալիս օգտատերերին հետեւել։ 

The Wall Street Journal-ի փոխանցմամբ՝ ԱՄՆ հեռահաղորդակցության ոլորտի հսկաները, այդ թվում՝ Verizon-ն ու AT&T-ը հետեւել են իշխանությունների կոչին՝ հրաժարվելով Huawei-ի արտադրանքից։ Սակայն որոշ ամերիկյան պրովայդերներ դեռ շարունակում են գնել չինական արտադրության սարքեր։ 

Խոսքն այն սուբսիդիայի մասին է, որ ամերկյան իշխանությունների կողմից սահմանվել է գյուղական տարածքներում լայնամասշտաբ ինտերնետի հասանելիության ապահովման եւ էժան սակագնային պլաններ տրամադրելու համար։ 

Huawei-ը, սակայն, հերքել է, որ իրենց արտադրանքներում հատուկ ծրագրեր կան, որոնք հնարավորություն են տալիս օգտատերին հսկել։