ՌԴ քաղաքացի 44-ամյա Կոնստանտին Չեխովսկին ԱՄՆ-ում ավելի քան 100 հազար դոլար արժողությամբ զենքի մասեր եւ զինամթերք դուրս հանելու փորձի համար դատապարտվել է 18 ամսվա ազատազրկման: Այս մասին, ինչպես հաղորդում է ՌԲԿ-ն, նշվում է ԱՄՆ-ի ներգաղթային եւ մաքսային ոստիկանության հաղորդագրության մեջ:
Չեխովսկին նաեւ տուգանվել է 100 հազար դոլարով: Ռուսաստանցուն ձերբակալել են Չիկագոյի միջազգային օդանավակայանում 2017 թվականի ապրիլին Ստոկհոլմ թռչելու փորձի ժամանակ: Չեխովսկու 11 ուղեբեռներում ոստիկանները հայտնաբերել են հրազենի մասեր, այդ թվում` ԱԿ-47 Կալաշնիկով հրացանի եւ M4 գրոհային հրացանների, զինամթերքներ, պահունակներ եւ թիրախներ: Ոստիկանությունը նշել է, որ ռուսը զենքի արտահանման թույլտվություն չուներ: Անցյալ տարի Չեխովսկին ընդունել էր իր մեղքը:
2018-ի փետրվարին ԱՄՆ-ում երկու ռուսաստանցիներ կիբեր հանցագործությունների եւ ֆինանսական տեղեկատվության գողության համար ազատազրկվել էին:
Վլադիմիր Դրինկմանին դատապարտել էին 12 տարվա ազատազրկման, Դմիտրի Սմիլյանցին՝ 4 տարվա եւ 4 ամսվա:
Հետաքննության համաձայն՝ Դրինկմանը եւ Սմիլյանցը նաեւ երեք այլ ռուսների եւ Ուկրաինայի քաղաքացու հետ 2005-2012 թվականներին խափանել էին ավելի քան 16 ընկերությունների համակարգչային ցանցերը եւ գողացել մոտ 160 մլն բանկային քարտերի համարներ: Նրանց հասցված վնասը գնահատվում է 300 մլն դոլար: