«Վանաձոր» քրեակատարողական հիմնարկի ղեկավարությանը կաշառելու մեջ մեղադրվող Արկադի Պապյանն իրեն առաջադրված մեղադրանքը չի ընդունում եւ շարունակելու է պայքարը: Այս մասին NEWS.am-ի հետ զրույցում ասաց Արկադի Պապյանի փաստաբան Ամրամ Մակինյանը:
«40 օր հացադուլի մեջ գտնվելուց հետո Պապյանը գտնվում է վերականգնաման փուլում: իրեն Նա իրեն առաջադրված մեղադրանքը չի ընդունում եւ շարունակելու է պայքարը արդեն դատարանում »,-ասաց պաշտպանը:
Ամրամ Մակինյանը նշեց, որ գործով նախաքննությունն ավարտվել է, եւ դատախազը գործը դատարան ուղարկելու միջնորդություն է ներկայացրել:
Նշենք, որ Արկադի Պապյանը 40 օր հացադուլի մեջ էր գտնվում` բողոքելով իրեն առաջադրված նոր մեղադրանքի դեմ:
Հիշեցնենք, որ Արկադի Պապյանը դատապարտվել էր 2012 թվականին Կիսելյովսկում կատարված Իգոր Նիկոնովի սպանության համար 9 տարվա ազատազրկման: Իգոր Նիկոնովը ՌԴ հանցավոր աշխարհի հեղինակություններից էր, որը հակակրանք ու հակասություններ ունի հայազգի անձանց նկատմամբ, ինչը եւ հանդիսացել էր, ըստ դատական գործի, սպանության շարժառիթը:
Մի քանի ամսից Պապյանի ազատազրկման ժամկետն ավարտվում էր, բայց ԱԱԾ-ն կալանավայրում կոռուպցիոն բացահայտումներ արվեց, ինչի հետեւանքով Արկադի Պապյանին եւ Թամազ Ֆերոյանին անցյալ տարեվերջին նոր մեղադրանքներ առաջադրվեցին, եւ նրանք տեղափոխվեցին «Նուբարաշեն» ՔԿՀ:
Հիշեցնենք, որ նա մեղադրվում է «Վանաձոր» քրեակատարողական հիմնարկի ղեկավարությանը առանձնապես խոշոր չափերի՝ ընդհանուր առմամբ մոտ 2․5 մլն դրամի կաշառք տալու համար։ Ըստ քրեական գործի նյութերի, Արկադի Պապյանը՝ կաշառելով քրեակատարողական հիմնարկի պաշտոնյաներին, փորձել է արտոնություններ ստանալ՝ որ որոշ խցերի դռները բաց պահվեն, թույլատրվի ազատ ելումուտ այդ խցեր, արգելված իրերի մուտքը, ալկոհոլի եւ թմրամիջոցների օգտագործումը, ինտերնետն ու բջջային կապը: