Երեւանի Բադալ Մուրադյան 7-րդ շենքի բնակարաններից մեկում մարտի 22-ին հոսանքահարված 10-ամսական երեխայի վիճակը միջին ծանրության է, նրա կյանքին վտանգ չի սպառնում: Այս մասին NEWS.am-ի հետ զրույցում ասաց ԵՊԲՀ մամուլի պատասխանատու Շուշան Դանիելյանը:
Շուշան Դանիելյանը նշեց, որ երեխայի սրունքի մասն է ախտահարվել, եւ դեռ հայտնի չէ, թե որքասն ժամանակ նա կմնա հիվանդանոցում:
Ավելի վաղ Քննչական կոմիտեն հայտնել էր, որ 2018 թվականի մարտի 22-ին «Մուրացան» բժշկական կենտրոնից հաղորդում է ստացվել, որ Նոր Նորք վարչական շրջանի բնակարաններից մեկից «էլեկտրահարվածություն, ձախ սրունքի այրված վերք» ախտորոշմամբ բուժօգնության է տեղափոխվել 10 ամսական երեխա։ Բացի այդ, նույն բնակարանում հայտնաբերվել է երեխայի տատիկի դին, ով, նախնական վարկածով, մահացել է էլեկտրահարվելու հետևանքով։
Դեպքի վայրի զննությամբ՝ բնակարանում՝ գետնին, հայտնաբերվել է մանկահասակ երեխայի տատիկի դին՝ վերին վերջույթների` դաստակների, նախաբազուկների դրսային, առաջամիջնային մակերեսների, աջ կրծքագեղձի, ձախ սրունքի շրջաններում բազմաթիվ մոխրացած, ածխացած, դարչնագույն վնասվածքներով:
Լոգարանի հարևանությամբ գտնվող ննջասենյակում հայտնաբերվել է վնասված էլեկտրական սավան: Նախնական տվյալներով՝ դեպքի պահին տանը գտնվել են թոռնիկը՝ տատիկի (ծնված 10.11.1953թ.) հետ միասին։
Նշանակվել են դատաբժշկական և դիակի դատաբժշկական փորձաքննություններ: